قبل ما حضرتك تتكلمي عن الفلوس، اسألي ابنك الأول ليه بيجهز ورق طلاقي من ورايا؟ واسأليه كمان مين اللي كان موجود في أوضة نومي من يومين، وهو بيقفل سوستة فستانها!
القاعة كلها سكتت.
الناس بصت لبعضها، وشهاب اللي كان واقف بعيد اتجمد مكانه، ووشه اتغير في لحظة.
أما حماتي، فقربت مني بخطوات سريعة، ومسكَت دراعي، وهمست في ودني بكلام خلاني أحس إن الخيانة أكبر بكتير من مجرد علاقة بين جوزي وسكرتيرته.
قالتلي بابتسامة باردة:
يا غبية، إنتِ لسه متعرفيش إحنا محضرينلك إيه! شهاب مش بيتصرف لوحده، وإنتِ مش هتخرجي من الموضوع ده بالسهولة اللي إنتِ فاكراها!
ساعتها فهمت إن الموضوع مش مجرد خيانة وطلاق…
دول كانوا محضرين لمؤامرة أكبر، ومخططين ياخدوا مني كل حاجة بنيتها بتعبي وفلوسي!
سحبت إيدي من قبضة حماتي بهدوء أعصاب أرعبها هي شخصيًا، الهدوء ده بالذات مكنتش متعودة عليه مني. أنا دايماً كنت غرام الطيبة، الهادية، اللي بتشتري خاطر الكل عشان مركب الجواز تمشي. بس المركب خلاص غرقت، واللي بيغرق مبقاش يخاف من البلل.
بصيت في عينيها ورديت بصوت واطي جداً ومسموع ليها لوحدها:
اللي محضرينه ده، اطبخوه على مهلكم يا طنط.. بس افتكري كويس مين اللي اشترى البوتاجاز ومين صاحب المطبخ كله.
شهاب كان جاي بيجري من آخر القاعة، وشه كان مخطوف، لونه أصفر زي الليمونة وعروق رقبته ناطة من الغيظ والإحراج. الناس في الفرح كلها كانت بدأت تتهامس، الموسيقى سكتت، والمعازيم عيونهم متعلقة بينا وكأنهم بيتفرجوا على مشهد من مسلسل درامي. وصل عندي ومد إيده عشان يمسك كتفي ويزقني بعيد عن عيون الناس، لكني رجعت خطوة لورا ورفعت صباعي في وشه بحزم:
إيدك متلمسنيش يا شهاب.. اللي بيني وبينك مبقاش يتقال في صالات الأفراح، ده هيتقال في أروقة المحاكم.
غرام! إنتِ اتجننتي؟! إيه التخاريف والفضيحة اللي عملاها دي؟ يلا نروّح ونتكلم في البيت، إنتِ أكيد فاهمة حاجة غلط! قالها بصوت بيترجف من التوتر، بيحاول يرقع الموقف قدام قرايبه ورجال الأعمال اللي حاضرين، بس صوته كان فاشل تماماً في إخفاء الرعب اللي جواه.
ابتسمت بسخرية، سبت الميكروفون على الترابيزة اللي جنبي، ولفيت ضهري ومشيت وسط ذهول الكل. خطوات كعبي على رخام القاعة كانت بتدوي، ومحدش قدر ينطق بكلمة واحدة. خرجت برا القاعة وأنا باخد نفس طويل جداً، الهوا البارد بتاع الليل لطش وشي، حسيت لأول مرة من سنين إني حرة، بس في نفس الوقت، جملة حماتي كانت بترن في دماغي زي جرس إنذار مستمر:
إنتِ لسه متعرفيش إحنا محضرينلك إيه! شهاب مش بيتصرف لوحده.
ركبت عربيتي، وقفلت الأبواب. مكنتش هروح البيت طبعاً، روحي في المكان ده بقت خانقة ومستحيلة. دورت العربية واتحركت على فندق في التجمع، قريب من مقر الشركة. وأنا في الطريق، تليفوني مهدّاش.. رنات متواصلة من شهاب، رسايل واتساب مليانة اعتذارات ممزوجة بتنيهات مبطنة:
غرام افتحي، إنتِ دمرتي شكلي، لازم نتكلم، متخليش الغضب يعميكي وتضيعي كل حاجة.
متجاهلتش رسايله وبس، أنا عملتله بلوك هو وأمه بالكامل.
وصلت الأوتيل، طلعت الأوضة، وفتحت اللاب توب بتاعي فوراً. جملة أمه إن شهاب مش شغال لوحده مكنتش كلمة بتتقال في ساعة غضب، دي كانت زلة لسان كشفت مستور. أنا بمتلك 69 من أسهم إيه إم للحلول التكنولوجية، شهاب معاه 21، والمستثمرين الباقيين معاهم 10. قانوناً، مفيش أي قرار يقدر ياخده من غير موافقتي، ولا حتى يقدر يهز شعرة في الشركة.. إلا لو في حاجة أنا مش شيفاها.
فتحت السيستم الداخلي للشركة من حساب الإدارة العليا بتاعي، ودخلت على قسم الحسابات والعقود. فضلت قاعدة على السرير واللاب في حجري، مركزة في كل ورقة اتسجلت في الشهرين اللي فاتوا، وتحديداً في فترة انشغالي بتجهيز فرع باريس وعقود الشراكة الأوروبية. وفجأة، عيني وقفت على كارثة.
لقيت أمر تفويض مالي وإداري معمول بصفتي، بتاريخ قديم من تلات شهور.. توقيعي محطوط عليه! بصيت على الإمضاء بذهول وقربت الشاشة لعينيا.. التزوير كان معمول بحرفية مريبة، مقلدين إمضائي لدرجة تخض.
فتحت تفاصيل التفويض ده، واكتشفت المصيبة الأكبر: التفويض ده بيدي شهاب الحق في توقيع عقود توريد وشراكة بدون الرجوع لمجلس الإدارة، وبموجب الورقة دي، شهاب كان مدخل الشركة في عقد توريد خوادم وأنظمة أمنية مع شركة اسمها ألفا تك.. مين أصحاب شركة ألفا تك دي؟ بحثت في السجل التجاري المربوط بالداتا بيز، ولقيت المفاجأة اللي صدمتني أكتر من خيانته في أوضة نومي: الشركة متسجلة باسم طارق السويفي.. أخو إلهام سكرتيرته! وباسم شريك تاني.. طليق أخت شهاب!
يعني مش بس علاقة عاطفية بعيدة، دي شبكة منظمة، مستغلين نفوذ شركتي، وكانوا بيسربوا عقود بملايين، وبياخدوا قروض بضمان أصول شركة إيه إم ويحولوها على حسابات الشركة الجديدة بتاعتهم! شهاب مكنش ناوي يطلقني وخلاص، شهاب كان بيغرق الشركة في ديون والتزامات، ويحلب كل السيولة لحساب شركته الجديدة، ولما نعلن الإفلاس، هو يخرج كسبان كل حاجة، وأنا اللي أشيل الليلة قانونياً وجنائياً لأني صاحبة النسبة الحاكمة ورئيسة مجلس الإدارة!
جسمي كله اتنفض، العرق نزل على جبيني رغم برودة التكييف. الوقت كان بيجري، والساعة عدت تلاتة الفجر.
اتصلت بالمستشار محمود للمرة التانية، ورغم تأخر الوقت، رد عليا على طول بصوت كان صاحي ومستني:
خير يا غرام؟ طمنيني، الأخبار وصلتني عن اللي عملتيه في الفرح، البلد كلها بتتكلم!
أستاذ محمود، الفرح ده كان مجرد قشرة.. الموضوع أكبر من خيانة زوجية بكتير. شهاب مزور توقيعي وواخد قروض بضمان الشركة ومدخلنا في التزامات وهمية مع شركة تانية عشان يسحب السيولة ويفلس إيه إم.
محمود سكت لثواني، وسمعت صوت ورقة بتتحرك عنده:
