أنا ههد المعبد ده عليكي وعلى الكل! فاكرة نفسك هتطلعي كسبانة؟! ده أنا هوديكي ورا الشمس!
وفجأة، وقبل ما يتحرك خطوة تانية ناحيتي، باب المكتب اتفتح على مصراعيه.
دخل راجل طويل ببدلة سيكورتي رسمية، ووراه ضابط شرطة بنجمتين على كتفه، ومعاهم المستشار محمود وشخصين من طاقم مكتبه ماسكين دفاتر محاضر رسمية.
الضابط بص للمكتب، بص للشاشة المكسورة على الأرض، وبص لشهاب اللي واقف زي المجنون ولإلهام اللي بتبكي ومنهارة:
إيه الدوشة دي؟ مين هنا الأستاذ شهاب المنياوي؟
شهاب اتسمر، بص للضابط، وبص لمحمود، ورجع بصلي بنظرة رعب عمري ما شوفتها في عينيه قبل كده:
أنا.. أنا شهاب.. في إيه يا حضرة الظابط؟ دي مشاكل عائلية وشغل بيني وبين مراتي، مفيش داعي للمهزلة دي!
محمود طلع دوسيه أزرق رسمي من شنطته وقدمه للظابط:
يا فندم، إحنا مقدمين بلاغ فوري من الفجر للنيابة العامة بموجب توكيل رسمي من الباشمهندسة غرام، بتهمة تزوير مستندات رسمية واستيلاء على مال عام وخيانة أمانة وإتلاف ممتلكات خاصة للشركة، ومعانا إذن تفتيش وإثبات حالة للمقر قبل العبث بالأدلة.
الضابط شاور للأمين اللي معاه:
حرزلي اللابات دي كلها والفلاشات اللي في الدرج، ومحدش يلمس ورقة من على الأرض. وأستاذ شهاب، وأستاذة إلهام.. اتفضلوا معانا على القسم بهدوء عشان الإجراءات.
إلهام انهارت في العياط وهتفت:
أنا ماليش دعوة والله! هو اللي قالي مضي أخوكي على العقود، هو اللي خطط لكل حاجة وقالي إنه هياخد حقه منها وهيطلقها ونتجوز ونعيش برا مصر! أنا مليش ذنب!
شهاب زعق فيها بحقد:
اخرسي يا حقيرة! اخرسي متقوليش حرف!
التفت ليا شهاب وهو بيتسحب من أمين الشرطة، كان بيحاول يقاوم، صوته كان بيرن في الطرقة وهو بيتجرجر للأسانسير:
مش هسيبك يا غرام! ورحمة أمي ما هسيبك! إنتِ فاكرة إنك خلصتي؟! والله لأخليكي تندمي على اليوم اللي اتولدتي فيه! تفتكري أهلي هيسكتوا؟! تفتكري طارق السويفي والناس التقيلة اللي وراه هيسيبوكي في حالك؟! هتدفعي تمن الفضيحة دي أثر!
كنت واقفة مكاني، ملامحي صلبة زي الحجر، عيني مفيهاش حتى رمشة خوف. بصيتله لحد ما باب الأسانسير قفل عليه وقطع صوته المقرف.
المكتب بقى هادي فجأة. مفيش غير صوت المروحة المعلقة، وريحة الورق المحروق من مكنة الفرم، والتراب اللي طالع من الشاشة المكسورة.
المستشار محمود قرب مني، حط إيده على كتفي بنبرة أب حنين:
عملتي الصح يا بنتي.. خطوة شجاعة جداً، بس الحرب لسه بتبدأ. القضية دي هتاخد وقت في المحاكم، والناس اللي وراه دول مش ساهلين، طارق السويفي ده مسنود في السوق وعنده علاقات واسعة، ومش هيعدي حوار التمانية وعشرين مليون بالساهل.
خليهم يجوا يا أستاذ محمود.. اللي دخل المشكلة برجله مبيخافش من شرارها.
نزلت مع المستشار محمود لتحت. لما وصلنا للبهو الرئيسي، كان الموظفين بتوع الوردية الصباحية بدأوا يوصلوا. كانوا واقفين برة البوابات الزجاجية مذهولين، بيتفرجوا على عربيات الشرطة وهي بتاخد شهاب وإلهام وبتمشي، والهمسات كانت مالية المكان:
شهاب بيه اتقبض عليه؟، هي الست غرام رجعت؟، الشركة بتقفل ولا إيه؟.
طلبت من الأمن يفتح البوابات ويدخل كل الموظفين لقاعة الاجتماعات الرئيسية في الدور الأرضي.
بعد ربع ساعة، كانت القاعة مليانة بأكتر من خمسين موظف وموظفة، عيونهم كلها خوف وترقب، وخايفين على مستقبلهم وشغلهم وبيوتهم المفتوحة من الشركة دي.
وقفت قدامهم على المنصة، البدلة السودا عاكسة ضوء البروجكتور، وصوتي كان طالع بمايك القاعة واضح وقوي، مفيهوش أي اهتزاز:
صباح الخير جميعاً.. عارفة إن المنظر اللي شوفتوه الصبح يخض، وعارفة إن في أسئلة كتيرة بتدور في بالكم عن مصير إيه إم للحلول التكنولوجية. عايزة أقولكم كلمتين وتحطوهم حلقة في ودانكم: الشركة دي اتبنت بطوبة طوبة على إيدي، وعمرها ما كانت قايمة على شخص واحد خان الأمانة وفرط في تعب سنين. شهاب وإلهام تم إحالتهم للتحقيق الجنائي بتهم تمس نزاهة المكان، ومبقاش ليهم أي صفة وظيفية أو إدارية هنا من اللحظة دي. مرتباتكم، عقودكم، مكافآتكم، ومستقبلكم، في رقبتي أنا شخصياً، وأنا مش من النوع اللي بيخلف وعده. من النهاردة، إحنا بنبدأ مرحلة جديدة تماماً، مرحلة مفيهاش تهاون، مفيهاش محسوبية، ومفيهاش غير الشغل الصح. كل واحد يرجع لمكتبه، والسيرفرات هترجع تشتغل بضوابط جديدة خلال نص ساعة.
القاعة كلها سكتت لثواني، وبعدها انفجرت بالتصفيق من شباب كانوا عارفين كويس مين اللي كان بيشيل الشركة ومين اللي كان بياخد اللقطة.
بعد ما الاجتماع خلص، طلعت لمكتبي القديم المقفول بقاله شهور. قعدت على الكرسي الجلد المريح، غمضت عيني للحظة، وحسيت بصداع نصفي فظيع بيضرب في نافوخي. التوتر العصبي بتاع ال 24 ساعة اللي فاتوا كان بدأ يدفعني تمنه جسدياً.
فجأة، تليفوني الشخصي رن، رقم غريب ومش متسجل.
رديت بصوت حذر:
ألو؟
صوت رجالي عميق، هادي جداً، وفيه نبرة برود ترعب أكتر من زعيق شهاب، اتكلم على الطرف التاني:
أهلاً يا باشمهندسة غرام.. ألف مبروك الانتصار الصغير بتاع الصبح، شكل الحركة كانت مدروسة كويس.
عدلت ضهري وقولت بجمود:
مين معايا؟
ضحك ضحكة قصيرة واطية:
أنا طارق السويفي.. أخو إلهام، وشريك شهاب اللي إنتِ رميتيه في المحاسبة من شوية. أهلاً بيك يا أستاذ طارق، وكنت متوقعة مكالمتك الحقيقة، بس فكرتك هتحصلهم على النيابة، مش هتتصل بيا!
النيابة دي للعيال الصغيرة اللي بتلعب بالورق يا مدام غرام، إحنا لعبنا أكبر من كده بكتير. شهاب ده كان مجرد واجهة غبية، وإلهام أختي هتعرف تخرج منها زي الشعرة من العجين بشهادة الشهود وبورق التوكيلات اللي معاها. بس إنتِ.. إنتِ فتحتي على نفسك باب عقاب.
بيهيألك يا طارق.. باب عقاب ده إنتوا اللي دخلتوه برجلكم لما فكرتوا تسرقوا شقايا. اسمعيني كويس عشان الكلام ده مش هيتعاد.. التمانية وعشرين مليون جنيه بتوع عقود الخوادم، هينزلوا في حساب شركة ألفا تك بكرة الصبح، بالتراضي وبالقانون عن طريق الشيكات المقبولة الدفع اللي مضيتي عليها بنفسك زمان!
أنا ممضيتش على شيكات لحد!
