الباب اتفتح بصوت رنين ناعم. طرقة الدور التالت كانت هادية، المكاتب كلها مطفية، ما عدا باب المكتب الكبير، مكتب المدير العام، النور كان طالع من تحت عتبة الباب، وأصوات نقاش حاد ومكتوم واصلة لوداني.
قربت بخطوات بطيئة، مفيش صوت، النفس هادي زي بحيرة ميتة.
صوت إلهام كان باكي ومتوتر:
قولتلك بلاش الحركات دي يا شهاب! قولتلك بلاش العوج مع أهلك! أهي طينت الدنيا فوق دماغنا، والفضايح بقت بجلاجل، تفتكر لو حد صور الفرح ده ونزله تيك توك ولا لينكد إن، سمعتنا هتبقى إيه قدام المستثمرين والعملا؟!
شهاب كان بيزعق وهو بيلهث، وصوت تكسير خفيف وفتح أدراج بقوة:
اخرسي خالص يا إلهام! إنتِ اللي عينك فارغة وقولتيلي نروح الفرح ونغيظها بالشبكة اللي اشتريتهالك! غرام مش غبية، بس هي اتصرفت بعواطف ست مقهورة، الفضيحة تلات أيام والناس تنساها، المهم الورق ده.. العقود دي لو اتنقلت على سيرفر ألفا تك والتحويل البنكي نزل، هي مش هتعرف تثبت مليم واحد، دي ست عاطفية، كلمتين ودمعتين في بيت أهلها وهيخلص الموضوع بورقة طلاق وتنازل!
في اللحظة دي، مديت إيدي وزقيت الباب بقوة.
الباب خبط في الحيطة ورجع خطوة لورا بصوت رزع هز الأوضة كلها.
المشهد جوا كان أشبه بمسرح جريمة حقيقي. شهاب كان قالع جاكت البدلة، مشمر قميصه وعرقه سايل، وماسك شنطة جلدية كبيرة بيحط فيها ملفات زرقا، وإلهام كانت قاعدة قدام شاشتها بتبضرب كليك على الماوس بسرعة وتدخل فلاشات ميموري في الكيسة، وعلى الترابيزة مكنة فرم ورق صغيرة عمالة تبلع مستندات وتطلعها شرايط بيضا.
الاتنين اتسمروا مكانهم. شهاب وقف مبلم، عينيه وسعت بشكل هستيري، وإلهام شهقت وحطت إيدها على بؤها وكأنها شافت شبح.
بصيت ليهم من فوق لتحت ببرود تام، قفلت الباب ورايا بهدوء، وسندت ضهري عليه، وربعت إيديا.
صباح الخير يا بشمهندس.. يا ترى الفطار النهاردة فيه جبنة برضه ولا سيبته لإلهام تجهزهولك؟
شهاب بلع ريقه بصعوبة، حاول يفرك وشه ويسترجع قناع الراجل المسيطر:
غرام.. إنتِ.. إنتِ إيه اللي جابك دلوقتي؟ ومن امتى بتدخلي كده من غير خبط؟!
من نفس اللحظة اللي بقيت بدخل فيها أوضة نومي وألاقي سكرتيرتك بتقيس فساتينها فيها. ومن نفس اللحظة اللي عرفت فيها إنك بتزور إمضتي عشان تنهب عرق سنيني.
إلهام وقفت بسرعة، وشها كان لونه شاحب، وحاولت تتكلم بنبرة كبرياء مصطنعة:
مدام غرام، لو سمحتي انتقي ألفاظك، أنا هنا موظفة وبشتغل بمهنية، ومفيش بيني وبين الأستاذ شهاب غير كل احترام، واللي حصل في الفرح ده تجاوز وتشهير وأنا هرفع قضية
مسبتهاش تكمل. مشيت خطوتين ووقفت قدام مكتبها، بصيت في عينيها مباشرة بنظرة خلت لسانها يقف في حلقها:
تقصدي ترفعي قضية بشهادة أخوكي طارق السويفي؟ صاحب شركة ألفا تك اللي أخدت عقود بتمانية وعشرين مليون جنيه من غير مناقصة وبتفويض مزور باسمي؟ ولا بشهادة طليق أخت شهاب الشريك التاني؟
الكلمة نزلت عليهم زي صاعقة كهربية. شهاب وقعت من إيده الدوسيهات اللي كان ماسكها، الورق اتنثر على الأرض. وشه كان بيقول كلمة واحدة: عرفت إزاي؟.
إلهام قعدت مكانها على الكرسي كأن ركبها سابت، وبصت لشهاب برعب:
شهاب.. دي.. دي عارفة كل حاجة! قولتلك هتودينا في داهية!
شهاب قرب مني بخطوات سريعة، ملامحه اتقلبت من الصدمة للشر المحض. عينيه احمرت وقرب وشه من وشي بصوت واطي ومبحوح كله غل:
وبعدين معاكي يا غرام؟ إنتِ فاكرة نفسك مين؟ فاكرة إنك عشان معاكي النسبة الأكبر تقدري تلوفي دراعي؟ الشركة دي اسمي أنا اللي شايلها في السوق! إنتِ مجرد ممولة، واحدة ست قعدت سنين خلف الستارة وأنا اللي بلف وأقابل الوزراء والعملا! من غيري إنتِ ولا حاجة!
ضحكت من قلبي، ضحكة رنت في أرجاء المكتب المستفز ده:
اسمك إنت؟! شهاب بيه، نسيت لما كنت بتستلف حق بدلة التخرج بتاعتك مني؟ نسيت إنك لما قعدت قدام أول بنك طلبت منهم تمويل، مدير البنك قالك بالحرف إحنا بنمول ملاءة والد غرام مش فكرتك؟ إنت طلعت على كتافي يا شهاب، ولما كتافي وجعتني وعوزت أسند، أول حاجة فكرت فيها إنك تغرس سكينتك في ضهري!
شهاب حاول يمسك إيدي بغضب:
اسمغي هنا! اللعب على المكشوف خلاص.. الورق ده أنا همشي بيه دلوقتي، والفولدرات دي فيها أسرار الأنظمة كلها، لو معملناش تسوية ودية دلوقتي، ووافقتي على التنازل عن 40 من حصتك في الشركة مقابل الطلاق، أنا هسرب الأكواد دي كلها للمنافسين في السوق، وخلي إيه إم بتاعتك تسوى تلاتة مليم في البورصة!
بصيت على إيده اللي ماسكة معصمي، وبصيت في عينيه بنظرة جافة تماماً:
شيل إيدك يا شهاب.. عشان المرة دي مش هحذرك.
في اللحظة دي، شاشة كمبيوتر إلهام طفت، ورجعت اشتغلت بصفحة زرقا مكتوب عليها Access Denied System Locked by Admin تم رفض الوصول النظام مقفول بواسطة المسؤول.
إلهام هتفت بصوت مخنوق:
شهاب! السيستم قفل! الفلاشة مش راضية تسحب ولا ملف، والكونكشن مع سيرفرات البنك فصل!
شهاب ساب إيدي ولف على كمبيوتره هو كمان، بدأ يضرب على الكيبورد بجنون، وشه بقى أحمر زي الأثر، العروق نافرة في جبهته بشكل يخوف:
إيه ده؟! مين اللي عمل كده؟! مين اللي ادى الأمر ده؟!
أنا.. رديت عليه بكل هدوء وأنا بطلع إزازة مية صغيرة من شنطتي وبشرب منها ببرود:
رامي عزل السيرفرات بالكامل من عشر دقايق. كل جهاز في المبنى ده دلوقتي عبارة عن حتة حديدة ملوش أي لقطة بالداتا بيز الحقيقية. الداتا متأمنة على كلاود برايفت باسمي الشخصي، برقم كودي ميعرفوش غيري أنا والمستشار القانوني.
شهاب اتجنن. مسك شاشة الكمبيوتر بتاعته ورزعها على الأرض، صوت الزجاج وهو بيتكسر كان مفزع، وهتف بأعلى صوته:
