
قاطعه صلاح: كلامك دا ملهوش مكان هنا، وحكاية قد المقام ومن نفس الطبقة الكلام دا كله ميهمنيش، زي ما قولت لك أهم حاجة عندي سعادة بنتي وراحتها.
عمر: طب أنا أفهم إنها مش موافقة؟
صلاح: انت كسفتها بطلبك.
عمر: مش قصدي والله، أنا كنت عايز أعرف رأي حضرتك ورأيها هي كمان.
صلاح: طب خليك، أنا هروح أفهم منها. قام من مكانه ووقف عمر احتراماً له. دخل صلاح الفيلا وجد وفاء تستند على أحد الأعمدة وتضع يدها على قلبها لعلها تهدأ من دقاته العالية.
صلاح: وفاء.
وفاء: هااا، في حاجة يابابا؟
صلاح: أيوة يا حبيبتي، ازاي تطلعي تجري زي العيال الصغار؟
وفاء: بصراحة متوقعتش إنه ممكن يطلبني بالسرعة دي، واتكسفت اوي وفرحت واتلخبط ومكنتش عارفة أعمل إيه.
صلاح: طب تعالي نروح لعمر أحسن، دا فكر انك مش موافقة عليه عشان كدا طلعتي تجري.
مسكت يده تسحبه: يالا بسرعة يابابا نروح له.
صلاح: يابنتي اهدي شوية، مش كدا. تعالي بس نروح لراجل عيب نسيبه لوحده كدا. أخذها وخرج إلى الحديقة حيث يجلس عمر، ووفاء نظرت له بخجل وجلست مقابلة له وهو ابتسم لها ابتسامة هادئة.
صلاح: ها ياحبيتي، إيه رأيك في طلب عمر؟
نظرت لعمر ثم لوالدها وهزت رأسها بالموافقة: بس أنا لسة عند شرطي إننا نعيش معك هنا.
عمر بفرح، وأن أخيراً تحقق حلمه: أكيد، أنا معنديش مانع صلاح بيه…
قاطعه صلاح: كدا بردو ياعمر؟ أنا بقول عليك من العيلة وزي ابني وانت تقول صلاح بيه؟
عمر: والله أنا نفسي أقول لحضرتك بابا زي وفاء، بس خايف إن حضرتك تزعل.
صلاح: أزعل منك ازاي؟ دا انت هتتجوز وفاء. بس أنا ليا طلب عندك.
عمر: طلب حضرتك تؤمر أمر وأنا أنفذ وبس.
صلاح بأبتسامة: أنا بس عايزك تسيب الشغل في شركة… وتيجي تشتغل معايا، دي كلها فلوس وفاء وانت أكتر واحد هتخاف على مصلحتها.
عمر من كثرة سعادته لم يستطع الكلام وهز رأسه بالموافقة، جمع الكلمات بصعوبة: أنا ممكن أطلب إننا نكتب الكتاب بعد بكرة؟
نظر صلاح لوفاء التي يبدو عليها السعادة والفرحة وأنها توافقه الرأي.
صلاح: انت مستعجل اوي كدا؟
عمر: بصراحة أيوة، وياريت الفرح يكون آخر الشهر.
صلاح بضحك: آخر الشهر دا كمان عشر أيام.
عمر: ياريت يكون بكرة.
صلاح: ها يا وفاء، إيه رأيك؟
ابتسمت بخجل: اللي تشوفه يابابا.
صلاح: طالما اللي أشوفه أنا معنديش مانع، على بركة الله.
عمر: طب استأذن أنا، الدنيا ليلت وأنا هنا من الصبح.
صلاح: وماله، دا بيتك خلاص، خليك اتعشى معنا.
عمر: لا والله أنا شبعان مش هقدر. ووقف وسلم على صلاح وقال: ميعادنا بعد بكرة إن شاء الله. ونظر لوفاء: أشوفك بكرة.
قامت معه كي توصله إلى الباب. عمر: هتوحشيني اوي لحد بكرة.
وفاء: وانت كمان.
عمر: أنا كمان إيه؟
وفاء: بس يا عمر.
عمر: ماشي يا ستي، بس بعد بكرة مفيش بس ياعمر. مقلداً صوتها.
ضحكت وفاء: أنا فرحانة اوي ياعمر.
عمر: مش أكتر مني ياحبيبتي.
شعرت الدوار، فهي أول مرة تجرب تلك المشاعر وأن أحداً يحبها ويقول لها مثل هذه الكلمات. ودعها عمر وقبل يدها بنعومة، فهو يعرف نقطة ضعفها أنها تشتاق للحب.
في شقة محمد
رجع محمد متأخراً ويبدو عليه التعب: السلام عليكم.
فيروز/أمينة: وعليكم السلام.
أمينة: إيه التأخير دا كله؟ الساعة خمسة.
فيروز: قلقتنا عليك يابابا.
محمد: أبداً يا ستي، كملت الشغل وروحت عشان أركب الأتوبيس لاقيت مشادة وأشخاص مختلفين، قمت حوشت بينهم، لاقيتهم غير مؤتمنين وأخذوا ما معي ومبقاش معايا ولا مليم، روحت جاي مشي.
فيروز: ياحبيبي يا بابا ماشيت دا كله؟
أمينة: معلش يا أخويا، المهم انك بخير، هروح أجبلك شوية مية دافية وملح تحط فيهم رجليك.
فيروز: وأنا هروح أحضر الغدا، أكيد جعان.
نظر لهم: ربنا يخليكم ليا وميحرمنيش منكم أبداً. ونظر لفيروز: بس انتي تعبانة وشك أصفر.
فيروز: أنا كويسة الحمد لله وتحضير الأكل مش متعب.
أحضرت أمينة المياه وجلست على الأرض وأمسكت قدمه لتخلع له جواربه ووضعت قدمه في الماء وقامت بتدليكها، وحضرت فيروز الأكل وبدأوا بالأكل. لكن فيروز شاردة الذهن تفكر: أيعقل أن عمر لم يعد حتى الآن؟ أو أنه جاء وعرف أنها مريضة ولم يهتم؟ فاقت من شرودها على صوت والدها: مالك يا فيروز مش بتأكلي ليه ياحبيبتي؟
فيروز: أبداً يا بابا، عندي صداع مش قادرة.
أمينة: بلاش تروحي بكرة وارتاحي.
فيروز: أنا كمان بفكر في كدا.
محمد: ارتاح شوية وانزل أجبلك برتقال كويس للبرد.
فيروز: مش مهم يابابا متتعبش نفسك.
محمد: تعب إيه؟ دا الراجل على أول الشارع.
بعد وقت نزل محمد واشترى البرتقال، وهو عائد تقابل على السلم مع عمر الذي يغني ويتراقص من الفرحة. محمد: ازيك يا عمر عامل إيه؟
لم يسمعه ولم يرد عليه وظل على حالته.
نظر له محمد بأستغراب: داماله دا فرحان كدا ليه؟ دا حتى مش سامعني ولا رد عليا. دخل شقته وأغلق الباب خلفه.
في شقة فاطمة
كانت تجلس والقلق والخوف سيطر عليها وأن ابنها قد حدث له مكروه، فهذا التأخير ليس طبيعياً.
فتح الباب ودخل وهو على نفس الحالة، أسرعت فاطمة إليه وأمسك يدها وظل يدور بها: وافق، بركيلي أخيراً أخيراً، يااااه أنا مش مصدق نفسي.
فاطمة بقلق من شكله الغير طبيعي: مالك يا حبيبي في إيه؟ ومين اللي وافق؟ ووافق على إيه؟ ماتفهمني وأبارك لك على إيه؟
أخذ نفساً عميقاً كي يسيطر على سعادته وفرحته: أنا خطبت انهاردة وكتب الكتاب بعد بكرة.
ضحكت فاطمة: خطبت؟ طب ما انت خاطب من زمان. بس ازاي تحدد كتب الكتاب بعد بكرة؟ ومحمد وافق؟ وليه ماختنيش معاك؟ سكتت قليلاً: كدا بردو يا أمينة؟ ماشي لما أشوفك الصبح والله ما هسكت. وانت ازاي…
قاطعها: أنا خطبت وفاء.
فاطمة بصدمة: وفاء مين؟
حكى لها كل شئ وأنه سوف يكتب الكتاب بعد غد، وأنه سوف يعيش معهم في الفيلا ويعمل مع والدها في شركاته.
نزل كلامه كالحجر على رأسها فأسكتتها الصدمة ولم ترد. لكن أيعقل أن ابنها يبيع حب عمره من أجل المال؟ وأنه سوف يتزوج واحدة غير فيروز؟ شعرت أنه ليس ابنها الذي تعبت في تربيته، يبيع نفسه من أجل المال.
فاطمة: انت بتقول إيه؟ إيه التخاريف دي؟ وفيروز؟
نظر لها ببرود: مالها فيروز؟
فاطمة بصدمة أكبر: مالها؟ مافكرتش فيها؟ وإيه ممكن يحصل لها لما تعرف انك بعتها عشان تأخذ صاحبتها الغنية؟
عمر بلامبالاة: أنا مش هفكر في حد، أنا هفكر في نفسي وبس، دي فرصة وجاتني وأنا لا يمكن أضيعها عشان خاطر حد، فاهمة؟
كانت تنظر له وكأنها ترى إنساناً غريباً عنها لا تعرفه، هذا ليس عمر، فهو لم يكن أنانياً بهذا الشكل: انت مش ابني ومستحيل تكون عمر ابني اللي ربيته وتعبت فيه. انت ازاي أناني كدا؟ ازاي هانت عليك فيروز وحبها ليك؟ ازاي هانت عليك نفسك تبيعها عشان الفلوس؟ ازاي هونت أنا عليك وانت عايز تروح تعيش معهم في الفيلا بتاعتهم؟ انت اييييييه. قالتها بصوت عالي.



