روايات وقصص

جديده

الفصل الثاني عشر

في غرفة فيروز، بعد أن تناولت بعض اللقيمات البسيطة.

أمينة: ماتأكلي يابنتي، انتي ماكلتيش حاجة.

فيروز: مش قادرة ياماما.

أمينة: طب اشربي اللبن يقويكي.

نظرت لكوب اللبن ثم إلى والدتها: مش هقدر، أنا بصيت للكوباية معدتي وجعتني.

وقفت أمينة عن مكانها وأمسكت الصينية كي تحملها إلى المطبخ.

فيروز: ماما، هو عمر مسألش عليا؟

التفتت إليها: لا ياحبيبتي، يمكن صحى متأخر ونزل جري.

هزت رأسها بالإيجاب: طب أنا هنام شوية، مش قادرة أقعد.

أمينة: نوم العافية ياحبيبتي. وخرجت وأغلقت الباب خلفها.

أغمضت عيونها تحاول النوم، ولكن لم تستطع، فكل الأفكار هاجمت عقلها مرة واحدة. تغير عمر معها واقترابه من وفاء وعدم اهتمامه بها ولا حتى السؤال عنها. وتذكرت كلام عمر يوم أن حكت له عن ابن عم وفاء، وترددت كلماته في أذنها: «حب إيه وكلام فارغ إيه، دي شركة كبيرة وليها سمعتها. قال مش بيحبها، قال ازاي يضيع فرصة زي دي، ازاي يضيع فرصة زي دي». تكررت هذه الجملة في أذنها عدة مرات حتى وضعت يدها على أذنها وهزت رأسها بالنفي عدة مرات: لأ، مش ممكن يكون عمر بيفكر كدا، دا بيحبني أكتر من نفسه.

نفسها: انتي مصدقة الكلام دا؟ أومال كل تغيره دا في الفترة دي بالذات معنها إيه؟

فيروز: لأ، أكيد ضغط الشغل ولا أي حاجة تانية، يمكن عشان هنتجوز بعد السنة ماتخلص وخلاص، الامتحانات فاضل عليها كام شهر.

نفسها: انتي بتضحكي على مين بالكلام دا؟ وبعدين هو الشغل جديد عليه؟ دا لما كان شغال في الفرن وطالع عينه من التعب كان مهتم بيكي وعمره مابعد عنك. وإن كان على الجواز هو اللي طلب كدا، يعني محدش ضغط عليه، وهو أصلاً هيتجوز في شقة أمه يعني مفيش حاجة صعبة هيجبها.

فيروز: ممكن عمر يعمل كدا؟

في الجامعة

عمر بتوتر: هو احنا هنروح دلوقتي؟

وفاء: أيوة، مالك خايف كد ليه؟

عمر: أبداً، بس والدك رجل أعمال معروف، يعني مش أي حد، وكمان مش عارف هو عايزني في إيه.

وفاء: على فكرة بابا أبسط من كدا بكتير، يعني بيتعامل عادي جداً مع الناس، مش زي ما أنت فاكر إنه رجل أعمال وغني ومتكبر، بالعكس بابا بسيط جداً في كل حاجة. وهو حابب يتعرف عليك من كلامي عنك. بس ياسيدي هاقولت إيه؟ هتيجي معايا ولا لأ؟ وبراحتك، مش هزعل لو مرضيتش تيجي تتعرف على بابا.

عمر يفكر: أكيد مش هيضيع الفرصة دي من إيده، دي الفرصة اللي كان بيحلم بها من زمان.

عمر: أكيد هاجي معاكي. هو احنا هنروح الشركة؟

وفاء: لأ، بابا انهاردة في الفيلا، أصله حاسس بشوية تعب، عشان كدا قالي لو عمر جالك هاتيه وتعالي على الفيلا.

عمر: طب يالا.

مشى معها إلى أن وصلوا للسيارة، وجد السائق يقف أمام السيارة، وما إن رآهم أسرع وفتح لوفاء الباب كي تركب، وأسرع وفتح الباب الآخر لعمر. شعر عمر بشعور غريب أول مرة يشعر به، أنه مهم وأن أحداً يخدمه. ركب السيارة وجلس بأريحية وسند ظهره للخلف، فهي سيارة كبيرة فخمة لم يحلم أن يركبها أو حتى يلمسها. فاق من شروده على وفاء: مالك سرحت في إيه؟

عمر بسعادة: لا أبداً، بس متوتر شوية من مقابلة والدك.

وفاء: لا مفيش داعي لكل التوتر دا، دلوقتي تشوفه بنفسك وتتعرف عليه.

عمر: طب يارب لما يشوفني ويتعرف عليا ميغيرش رأيه.

وفاء: أكيد لأ.

في شقة يحيى

بعد أن تجول بالسيارة كثيراً رجع للشقة، دخل ووضع المفتاح والهاتف على الطاولة وجلس على أول كرسي وجده أمامه بأهمال يحدث نفسه: يارتني ماعملت كدا، كنت كلمتها وجهاً لوجه بدل شغل المراهقين دا.

نفسه: ما أنت كل ما تكون قدامك مش بتقدر تتكلم، مع أن كان عندك فرص كتير اوي الفترة اللي فاتت.

يحيى: أيوة أنا عارف إني ضيعت فرص كتير وأنا وهي لوحدينا، بس مش عارف كل ما أبص لها بحس إني مش قادر أتكلم وإن في حاجز بيني وبينها. تنهد وأخذ نفساً عميقاً: يارب لو كانت من نصيبي قربها مني، ولو مش نصيبي امسح حبها من قلبي.

في شقة محمد

جاءت فاطمة لتجلس مع أمينة كعادتها كل يوم.

فاطمة: فيروز راحت الجامعة؟

أمينة: لأ والله، دي كانت تعبانة اوي امبارح وسخونة ومش حاسة بحاجة.

فاطمة بخضة: ياحبيتي يابنتي، وليه ماخبطيش علينا كدا بردو يا أمينة؟

أمينة: ماحبتش أقلقكم، وعملت لها كمادات ومحمد جاب لها دوا من الصيدلية والحمد لله بقت أحسن، بس ماقدرتش تنزل انهاردة.

فاطمة: طب هي فين؟ عايزة أشوفها.

أمينة: أكلت لقمة ونامت.

فاطمة: نوم العافية، خلاص لما يجي عمر أجي أنا وهو تكون صحت ونطمن عليها.

أمينة: براحتك، لو عايزة أدخل أصحيها.

فاطمة: لا خليها مرتاحة، أكيد جالها برد، أصل الدنيا تلج وهي بتطلع بدري ياحبة عيني عشان تلحق المواصلات. يالا أقوم أنا عشان أعمل أكل لعمر وبعد الغدا نيجي نطمن عليها.

أمينة: طب خليكي ونتغدا مع بعض.

فاطمة: لا بلاش، خليها يوم كتب الكتاب والفرحة الكبيرة، دا أنا بعد الأيام.

أمينة بضحك: ومين سمعك، دا نفسي الأيام تعدي بسرعة وأفرح بيهم ويتجوزوا، دول بيحبوا بعض طول عمرهم.

فاطمة: يارب يسعدهم، يالا فتك بعافية.

أمينة: الله يعافيكي.

ذهبت فاطمة ودخلت أمينة لتطمئن على فيروز، وجدتها في الفراش لكنها مستيقظة وليست نائمة كما اعتقدت.

أمينة: انتي صحيتي امتى؟

فيروز بكذب، فهي لم تنم أصلاً: دلوقتي.

أمينة: لو أعرف انك صحية كنت خليت خالتك فاطمة تدخل تطمن عليكي.

فيروز بلهفة: هي خالتي فاطمة كانت هنا؟

أمينة: أيوة، جت قعدت معايا شوية زي كل يوم وسألت عليكي، وأنا قولت لها انك عيانة ونايمة، وقالت خليها ترتاح وبعد الغدا هتيجي هي وعمر يطمنوا عليكي. يالا ياحبيبتي قومي ادخلي الحمام واتوضي وصلي.

هزت رأسها بالإيجاب دون كلام وقامت بخطوات بطيئة متعبة.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى