روايات

اتغيرت لاجلك اسرا ابراهيم

غزل بضيق ده هما سنتين انتي هتخليني عجزت بدري ليه وبعدين تعالي هنا انتي مروحتيش شغلك ليه

قمر بابتسامة واخدة اجازة متقلقيش هما عارفين اني عندي ظرف

غزل باستغراب نعم اجازة ايه اللي بعد اسبوع دي هي تكية عشان تاخدي اجازة بالسرعة دي

قمر وهي بتفتكر عز لا ماهو المدير بذات نفسه جه معايا يوم الحادثة لاما ماما كلمتني فشاف بعينه يعني الظرف اللي انا فيه

غزل بصدمة ايه السؤال معلش انتي مدير الشركة جه معاكي هنا لما عرف اللي حصل لا معلش ده ازاي ده ومدير ايه ده بقي

قمر بضحك والله انا نفسي مش مصدقة عموما ده موضوع طويل هبقي احكيهولك بعدين يلا كملي اكلك

سميرة بهدوء بقي عاوزة تفارقيني يا غزل ده انتي عارفة اني مليش غيرك انتي واختك ليه تعملي كدة

غزل بحزن حقك عليا يا امي صدقيني غصب عني ده كان الحل الوحيد اللي هيخليني اهرب من الجوازة دي كنت حاسة ان الابواب كلها متقفلة في وشي

قمر بعتاب انتي ازاي تقولي كدة وفي باب عمره ما يتقفل ابدا باب ربنا يا غزل لو خلاص الدنيا ضاقت بيكي صلي وادعيله ينجيكي بس انك تهربي باللي عملتيه وتخسري اخرتك كمان لا مينفعش ابدا

غزل بندم استغفر الله العظيم ربنا يسامحني

سميرة كانت هتتكلم بس قاطعها خبط الباب ودخول حامد ومعاه قاسم وشادي

حامد بابتسامة حمدالله عالسلامة يا غزل يا بنتي لا انتي انهاردة احسن كتير الحمد لله

غزل بزعل الله يسلمك يا جدي

قاسم بتردد الف سلامة عليكي يا غزل وانا اسف لو كنت السبب في اللي حصلك

غزل بضيق الله يسلمك

شادي كانت عنيه علي قمر بس هي كانت متجاهلاه تماما وبتبص اختها بشفقة لانها صعبان عليها

حامد بابتسامة انا فكرت وقررت يا غزل اني مش هضغط عليكي تاني في موضوع جوازك من قاسم اهم حاجة متبقيش زعلانة مني يا حبيبتي

غزل بصدمة وفرحة بجد يا جدو يعني انت مش هتخليني اتجوز قاسم غصب عني

حامد بابتسامة لا يا قلب جدك بعد اللي حصل انا اكتشفت اني كنت غلط وعشان كدة مش هضغط عليكم بعد كدة ابدا في اي حاجة

ابتسمت قمر بسعادة وبصت لغزل اللي كانت فرحتها هي كمان متتوصفش وكانت متابعاهم سميرة بفرحة ووقتها بصت لحامد بامتنان وشكر

بعد يومين كانت قاعدة قمر علي مكتبها بعد ما عينها عز مديرة الحسابات الخاصة بالشركة كلها فكانت مضغوطة اوي وم واخدة بالها من عز اللي واقف قدام مكتبها وبيراقبها

عز بابتسامة ده ايه النشاط ده كله

قمر بانتباه وهي بتقف مستر عز اهلا بحضرتك اعذرني مأخدتش بالي انك هنا اتفضل

دخل عز وقعد قدام مكتب قمر ها قوليلي فاضية ولا وراكي شغل مش بيخلص كالعادة

قمر باستغراب انا لسة قدامي شوية في الملف ده هو كان في حاجة يعني يا فندم

عز بتلقائية لا مفيش بس كنت هقولك نروح نتغدي سوا

كشرت قمر بسرعة وردت بجدية اسفة يا مستر عز بس مينفعش اني اخرج مع حضرتك قدام الموظفين هنا واروح اتغدي كمان معاك عندنا اسمه عيب وميصحش

عز باستغراب انا مقصدش حاجة انا قولت يعني نخرج مع بعض نتكلم شوية يا ستي اعتبريه مقابلة شغل

قمر بجدية مستر عز حضرتك انسان كويس وانا مش هفترض سوء نية ابدا بس احب اوضحلك ان انا مجرد موظفة عند حضرتك وان اكيد في حدود ما بيني وبينك زيي زي اي موظفة هنا واكيد حضرتك مش هيرضيك لما حد يقول كلمة عني مش كويسة لمجرد انه شافنا في مكان مع بعض حتي لو مكان عام مجرد انك حضرتك قاعد معايا هنا دلوقتي ده هيخلي الناس تتكلم عني باني مش كويسة واني بتقرب منك عشان منصب او سلطة

عز بجدية وهو بيقوم يقف تمام يا انسة قمر بعد اذنك

مشي عز وقمر كانت مضايقة انها زعلته بس مكنش في حل غير انها تعمل كدة عشان سمعتها وسط الناس اللي بتشتغل معاهم

كانت واقفة غزل بتشاور لتاكسي عشان تروح شغلها بس قاسم وقف قدامها بعربيته فنفخت غزل بضيق لما شافته

قاسم وهو جوة العربية اركبي يا غزل هوصلك

غزل برفض متشكرة يا قاسم انا هروح بتاكسي زي كل يوم اتفضل انت

نزل قاسم بقلة حيلة ممكن تركبي معايا هوصلك ونتكلم شوية اكيد مش هخطفك يعني يا غزل

غزل بعند احنا مفيش بينا كلام يا قاسم اعتقد انك سمعت جدي يعني خلاص مبقاش في بينا حاجة نتكلم فيها ياريت متعطلش نفسك بقي وروح شوف شغلك

قاسم باصرار ولو حلفتك بمرات عمي هترفضي برضه يلا بقي ده هما كلمتين وبس

غزل بقلة حيلة تمام يا قاسم بس ياريت متتكلمش في اللي حصل عشان مش هرجع في قراري

ركبت غزل عربية قاسم وهو كمان ركب مكانه وساق وهو فرحان انها اخيرا وافقت

غزل بهدوء خير يا قاسم كنت عاوز تقول ايه

قاسم بتنهيدة انا عارف انك بتكرهيني يا غزل بس انا مش فاهم ليه انا يمكن اه صعب شوية في معاملتي بس مش وحش اوي كدة يعني كان نفسي تديني فرصة حتي تعرفيني وبعدين تحكمي

غزل بهدوء انت بجد مش فاهم اني عارفاك كويس يا قاسم انا ممكن عارفاك اكتر من نفسك طول عمرك بتحب اللي انت عاوزه تاخده وحتي بعد ما كبرت بقيت تمسك في الحاجة اللي عاوزها اكتر وخصوصا لو هي مش متاحة جواز شادي اخوك من قمر اختي مش هو سبب رفضي ليك يا قاسم انا عارفة اني بالنسبالك لعبة انت عاوزها عشان هي رافضاك مش اكتر ومتأكدة انك بمجرد ما تملكها هتزهق وترميها وتشوف غيرها وانا مش لعبة يا قاسم مش هسمحلك تعمل فيا زي ما شادي عمل في قمر اختي

قاسم وقف العربية وبص لغزل بحزن للدرجادي شايفاني وحش يا غزل انا لو متمسك بيكي فده عشان بحبك مش عشان انتي لعبة انا عاوزها وهزهق منها وارميها بعد ما املكها انتي اكبر واجمل من كدة بكتير وعشان كدة كنت متمسك بيكي اه كنت بغيظك وبقولك اني هتجوزك غصب عنك بس انا عمري ما كنت هقدر اقرب منك كنت هخليكي تحبيني يا غزل بس انتي مدتنيش فرصة

غزل بتوتر اللي حصل حصل يا قاسم ياريت منتكلمش فيه تاني وانا بتمنالك السعادة وصدقني انا مش بكرهك انا بس مش عاوزة اكون نسخة قمر اختي

قاسم بجدية تمام يا غزل انا مش هقولك مبررات بس هسيب الايام تثبتلك اني مش كدة واني بحبك بجد

غزل اتوترت اكتر وبصت بعيد من غير ما ترد بسكان نفسها تتكلم وتواجه قاسم بتصرفاته معاها وانه ازاي بيقولها كدة وهي كل يومين بتشوفه وهي راجعة من الشغل بيبقي معاه واحدة في عربيته بس للاسف متكلمتش وقررت تقفل صفحته للابد

بعد كام يوم كانت واقفة قمر في اجتماع الشركة الخاص وبتشرح لكل الموجودين بالقاعة حسابات الشركة واصلة بحد فين وازاي بقدرو يعوضو الخسارة اللي الشركة خسرتها اخر فترة بعد اكتشافها للسرقة

قمر بابتسامة وبكده نقدر نعوض خسارتنا في اقل وقت بأذن الله

الكل سقفو ليها بحرارة وكان قاعد عز علي راس الترابيزة متابعها بغموض بدون اي رد فعل

عز بجدية تمام يا انسة قمر تقدري تتفضلي وابقي ابعتيلي كل ملفات الحسابات الخاصة بالمشروع الاخير

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى