
السؤال نزل عليها زي التلج. عينيها رفرفت وبصت لا إرادياً ناحية باب أوضتها المقفول. الحركة دي كانت كافية.. كافية جداً عشان أعرف إن طارق لسه ما استلمش الورقة في إيده! طارق بيهددني بورقة هو عارف مكانها بس لسه موصلهاش، لأن شهاب وهو بيتقبض عليه لحق يوصي أمه متسلمش الورق لطارق إلا لما يضمن خروجه!
مستنيتش ثانية واحدة. اتحركت بسرعة الصاروخ ناحية أوضة النوم. حماتي صرخت: رايحة فين يا مچنونة؟! اطلعي برا بيتي! اطلعي برا!
جرت ورايا وحاولت تمسك دراعي بأظافرها، بس لفيت ودفعتها بقوة خلتها تقع على كنبة الصالون. دخلت الأوضة ورزعت الباب بالمفتاح من جوا.
الأوضة كانت ريحتها بخور رخيص وعطر قديم. الدولاب الزان كان مقفول. بصيت على الكومودينو، مفيش حاجة. بصيت تحت السرير، لقيت شنطة هاندباج قديمة بتاعة شهاب. فتحت الشنطة، كان فيها أوراق تافهة وفواتير.
وفجأة افتكرت السلسلة اللي في رقبة فاطمة. لا، الخزنة دي ممكن تضيع مني وقت، بس شهاب كان دايماً بيخبي حاجته الشخصية في مكان تاني أذكى في الشقة دي.. ورا البراويز الكبيرة بتاعة صور أبوه الله يرحمه!
قربت من الحيطة اللي متعلق عليها برواز مدهب كبير لصورة حمايا. مديت إيدي وميلت البرواز.. وراه كان في تجويف صغير معمول في المحارة ومغطي بقطعة كرتون بلون الحيطة.
شيلت الكرتونة، ولقيت دوسيه بلاستيك شفاف. سحبته بسرعة وفتحته.
جواه، كان في دفتر الشيكات القديم بتاعي بتاع بنك مصر! فتحت الدفتر، لقيت كعب الشيكات مكتوب فيه بخط إيدي من خمس سنين مصاريف مستشفى ومستحقات صيدليات، وفي آخر الدفتر.. تلات ورقات شيكات مسحوبة من الدفتر، وورقة واحدة بس كانت محطوطة جواه، عليها إمضائي القديمة، ومكتوب فيها بالقلم الجاف الأزرق حديثاً: ادفعوا لأمر شركة ألفا تك للتجارة والتوريدات مبلغ وقدره 28000000 جنيه مصري لا غير، وتاريخ الصرف بكرة!
ومش بس كده، كان مع الشيك ورقة عرفية ممضية بين شهاب وبين طارق السويفي، اتفاقية سرية بتقول إن طارق هياخد 60 من قيمة الشيك بعد ما يتم الضغط عليّ والتنازل عن الشركة، وإن شهاب هياخد 40 وإلهام تاخد نسبة عمولة!
المؤامرة كانت موثقة بالكامل في ورقة واحدة! شهاب الغبي الخواف، عشان يضمن إن طارق ميغدرش بيه، كتب الاتفاق العرفي ده وخلاه هنا عشان يضمن بيه طارق لو فكر ينصب عليه!
صوت خبط ورزع عنيف على باب الأوضة قطع تركيزي، وصوت فاطمة بتصرخ پهستيريا: افتحي يا غرام! طارق ورجالته تحت في مدخل العمارة وطالعين! والله ما هتخرجي عايشة من هنا! افتحي يا بت الكلب!
حطيت الدوسيه في شنطتي الجلد الكبيرة، ولميت أعصابي في ثانية. طلعت موبايلي وصورت الشيك والاتفاقية العرفية بكاميرا الموبايل ورفعتهم فوراً على السحابة وبعت نسخة على واتساب المستشار محمود، وكتبتله تحتيها: معايا أصل الشيك واتفاقية الإلزام بخط طارق وشهاب، طارق طالع شقة فاطمة دلوقتي، بلّغ الشرطة حالاً!.
صوت جرس الباب الخارجي رن بعنف، وصوت رجالة بتزعق في الصالة، وبعدها صوت كسر أكرة باب الصالون، ثم خطوات تقيلة بتجري في الطرقة.
صوت طارق السويفي كان واضح من ورا باب الأوضة، مش البرود بتاع المكالمة، ده كان صوت وحش حاسس إن فريسته هتفلت من إيده: غرام! افتحي الباب بالذوق وبلاش غباء! الشقة محاصرة، والشارع كله تحت إيدي، لو خرجتي الورق اللي في إيدك ده مش هتلحقي تشوفي شمس بكرة! رديت عليه من ورا الباب بصوت ثابت ومستفز: الشيك والاتفاقية بتاعتك يا طارق بقوا في النيابة العامة من دقيقتين بالظبط.. صورتهم اترفعت، والنسخة الأصلية دي مش هتطولها حتى لو كسرت الباب!
اكسر الباب يا بني آدم منك له! اكسروا الباب وهاتوا الشنطة دي حية أو ضائعة!
الطرق بدأ على الباب الخشب، الباب كان قديم وضعيف وبدأ يشرخ مع كل طرقة كتف من الرجالة اللي معاه.
بصيت حوليا في الأوضة، مكنش قدامي غير حل واحد.. شباك الأوضة بيطل على منور واسع، ومنه في سلم طوارئ حديد قديم معمول للصيانة بينزل على جراج العمارة الخلفي.
فتحت الشباك بسرعة، الهوا البارد دخل مع صوت الكسر اللي كان خلاص بيخلع حلق الباب. نطيت برجلي على حافة السور الحديدي بتاع المنور، الشنطة كانت ملفوفة كروس على صدري بكل إحكام. النزول كان مرعب، الحديد كان بيزيق تحت جزمتي، بس مكنتش حاسة بأي خوف، الأدرينالين كان غامر جسمي كله.
نزلت دورين بسرعة، وسمعت صوت رزع الباب وهو بيطير من مكانه فوق، وصوت طارق بيصرخ من الشباك: هربت من المنور! انزلوا على الجراج بسرعة اقفلوا المخرج!
وصلت لأرضية الجراج الخلفي، الدنيا كانت ضلمة وتراب، جريت ناحية الباب الحديدي اللي بيفتح على الشارع الجانبي، زقيت الترباس وخرجت للشارع.
كانت الساعة داخلة على تمانية بالليل، الشارع في مصر الجديدة زحمة وناس ماشية في أمان الله. اتنفست الصعداء، بس لسه ملحقتش أرتاح.. اتنين من رجالة طارق خرجوا يجروا من مدخل العمارة الرئيسي، وشاوروا عليا: أهي هناك! امسكها!
جريت في اتجاه الشارع الرئيسي، بس قبل ما يوصلوا عندي بخمس خطوات، صوت سارينات شرطة ملأ المكان كله.
تلات بوكسات شرطة وعربية أمن مركزي طالعين بسرعة چنونية وقفلوا الشارع من الناحيتين، ووراهم عربية مرسيدس سودا نزل منها المستشار محمود ومعاه رئيس نيابة أمن الدولة بنفسه!
الرجالة بتوع طارق اتجمدوا مكانهم، وحاولوا يلفوا ويرجعوا، بس عساكر الأمن المركزي كانوا أسرع، حاصروهم وكلبشوهم في ثواني على أسفلت الشارع.
طارق نزل من مدخل العمارة ووشه أصفر زي المنهارين، حاول يمشي بهدوء كأنه ملوش دعوة، بس الضابط شاور عليه بصوت عالي: اقبض على طارق السويفي! ده المتهم الرئيسي المطلوب ضبطه وإحضاره!


