إنت بتتكلم بجد يا كريم؟ هو إنت شايف إن دي حاجة عادية؟ أنا ماليش دعوة بشريف ومش عايزة أعرف عنه أي حاجة
قفل موبايله وقال
يا بنتي بهزر معاكي
قلتله
أنا مش شايفة إن ده هزار خالص وبصراحة الطريقة اللي بتتكلم بيها عنه مش مريحاني
قمت من مكاني وسبته ومشيت
فضل يتصل بيا ويبعتلي رسائل لحد ما رجعت البيت ولقيته مستنيني تحت العمارة
كان واقف متوتر وأول ما شافني قرب مني وقال
نادية أنا آسف والله ماكانش قصدي أزعلك
قلتله وأنا بحاول أعدي من جنبه
خلاص يا كريم أنا تعبانة ومش عايزة أتكلم
مسك إيدي برفق وقال
حقك عليا أنا غلطان ومش هجيب سيرته تاني أنا بحبك ومش عايز أخسرك بسبب كلام ملوش أي لازمة
بصيت في عينيه وقلتله
أنا مش عايزة أدخل جواز جديد وأنا حاسة إن فيه حاجة مستخبية عني لو فيه سبب يخليك مهتم بشريف بالشكل ده قولي عليه من دلوقتي
رد بسرعة
مفيش أي سبب يا نادية أنا بس كنت بهزر وهزار سخيف واعترف إني غلطان
فضل يعتذر لحد ما قلبي لان ووافقت أعدي الموقف
ماكانش عندي دليل على حاجة تانية وكنت عايزة أصدق إن اللي حصل مجرد تصرف غير محسوب منه
وبعدها بدأت تجهيزات الفرح
كريم أصر إن الفرح يتعمل في فندق فخم جدًا وقال إنه عايز يعمللي ليلة عمري اللي أفضل أفتكرها طول حياتي
لما شفت الفندق انبهرت فعلًا
قاعة واسعة وسقف عالي ونجف ضخم وأرضية لامعة وديكورات راقية وكل حاجة كانت بتقول إن الليلة دي متحضّر لها بعناية شديدة
قلتله
كريم ده كتير أوي علينا
ابتسم وقال
إنتي تستاهلي أكتر من كده
سألته
إنت تعرف صاحب الفندق؟
قال وهو بيعدل ساعته
مش معرفة شخصية قوي لكن أكيد الناس اللي في مستوايا بتتعامل مع بعض
ماوقفتش عند كلامه وقتها لكن الأيام اللي بعدها بدأت تظهر تفاصيل غريبة
كل ما نروح الفندق عشان نراجع ترتيبات الفرح كان يسأل موظفة الاستقبال
مدير الفندق رجع من السفر ولا لسه؟
وفي كل مرة كانت الموظفة تقول له إن المدير مش موجود وإنه هيرجع قريب
وكان كريم يرجع يسألها
يعني أكيد هيكون موجود ليلة الفرح؟
فترد عليه
أيوه يا فندم غالبًا هيكون موجود بنفسه
كنت واقفة جنبه وبسمع الكلام فبصيتله وقلت
هو إنت ليه مصمم إن مدير الفندق يحضر فرحنا؟
ابتسم ابتسامة صغيرة وقال
عشان كل حاجة تمشي زي ما أنا عايز بالظبط ده فندق كبير وأنا عايز الخدمة تكون على أعلى مستوى
قلتله
بس إحنا دافعين حق القاعة والخدمة وكل حاجة متفق عليها
رد بسرعة
يا ستي ماتكبريش الموضوع أنا بحب كل حاجة تبقى مظبوطة
وساعتها قررت أسكت لأنني كنت تعبت من الشك في كل تصرفاته وقلت لنفسي إن ضغط تجهيزات الفرح ممكن يكون مأثر عليه
مرت الأيام ووصلنا لليلة الفرح
كنت واقفة قدام المراية في أوضة العروسة بفستاني الأبيض وببص لنفسي وأنا مش مصدقة إنني هبدأ حياة جديدة بعد كل اللي عديت بيه
أمي كانت واقفة ورايا بتظبط الطرحة وعينيها مليانة دموع
قالتلي
ربنا يسعد قلبك يا بنتي ويعوضك عن كل لحظة زعل عشتيها
ابتسمت لها ودموعي نزلت غصب عني
حضنتني وقالت
بس خلي بالك من نفسك يا نادية السعادة مش في الفرح الكبير ولا الفستان الغالي السعادة إنك تبقي مع راجل يصونك ويحترمك حتى وإنتوا مختلفين
هزيت راسي وقلت
إن شاء الله يا ماما
ماكنتش أعرف وقتها إن الجملة دي هتفضل ترن في وداني طول الليلة
خرجت من الأوضة وسط تصفيق الناس والزغاريد والموسيقى وكانت القاعة متزينة بشكل يخطف العين
كريم كان واقف على المسرح في بدلته السودا وأول ما شافني ابتسم ومد إيده ليا
مسكت إيده ووقفت جنبه
كل الناس كانت بتصور وبتبارك وبتضحك لكن أنا لاحظت من أول لحظة إن كريم مش مركز معايا زي ما كنت متوقعة
كان كل شوية يبص ناحية المدخل وبعدها يبص للموبايل ويرجع يبتسم ابتسامة غريبة
في البداية حاولت أتجاهل الموضوع لكن بعد شوية قربت منه وهمست
كريم إنت مستني حد؟
قال من غير ما يبصلي
أيوه مستني مفاجأة صغيرة
ابتسمت وقلت
مفاجأة إيه بس؟ إنت كفاية إنك عامل الفرح بالشكل ده
بصلي وقال
لأ دي مفاجأة هتعجبك أوي
ماحبيتش طريقته لكن قبل ما أسأله أكتر لقيته فجأة وقف وعدل وقفته وبص ناحية مدخل القاعة
ابتسامته اتسعت بطريقة خلتني أحس إن فيه حاجة غلط
مسك إيدي بقوة شوية وقال
بصي يا نادية مين اللي شرفنا أخيرًا
لفيت وشي ناحية الباب
وفي اللحظة دي حسيت إن الأرض بتتحرك من تحتي
كان شريف
طليقي واقف عند مدخل القاعة ببدلته الكحلي وملامحه جامدة وعينيه بتتنقل بيني وبين كريم وبين الزينة اللي مالية المكان
ماكانش جاي لوحده كان معاه اتنين من إدارة الفندق وراجل كبير في السن واضح من طريقة تعامل الموظفين معاه إنه شخصية مهمة
شريف ماكانش بيبصلي بس بصدمة زي ما كريم كان متوقع
كان بيبص للقاعة كلها وكأنه بيحاول يستوعب حاجة أكبر بكتير من مجرد إنه شاف طليقته في فرحها
كريم قرب مني وهمس بصوت مليان شماتة
إيه رأيك في المفاجأة؟ كنت عارف إنه مش هيقدر يشوفك بتتجوزي غيره من غير ما ييجي بنفسه
بصيتله وأنا مش مصدقة اللي بسمعه
قلتله بصوت واطي لكنه حاد
إنت اللي عزمته؟
ابتسم وقال
طبعًا يا حبيبتي ما أنا قلتلك إن عندي مفاجأة
حسيت إن دمي بيغلي
يعني كل الأسئلة اللي كنت بتسألها عن شريف وكل إصرارك إن مدير الفندق يحضر الفرح كان علشان توصل للحظة دي؟
رد وهو بيحاول يخبي ضحكته
أنا بس حبيت أخليه يشوف بعينه إنك بقيتي مراتي وإنك نسيتيه تمامًا
قلتله
إنت جبت راجل من ماضي حياتي في ليلة المفروض تكون أسعد ليلة في حياتي من غير ما تقولي؟
قال ببرود
يا نادية ده مجرد حضور مش أكتر هو اللي اختار ييجي
كنت لسه هرد عليه لما شريف بدأ يتحرك ناحية المسرح
كل خطوة كان بيخطوها كانت بتخلي الهمس في القاعة يزيد والناس تبص لبعضها باستغراب
كريم وقف باستعداد وكأنه مستني لحظة انتصاره
ولما شريف وصل قدامنا مد إيده لكريم وقال بهدوء
مساء الخير يا فندم
كريم مد إيده له وهو بيحاول يبان واثق
أهلًا يا أستاذ شريف نورت الفرح
شريف بصله لثواني طويلة وبعدين قال
هو إحنا اتقابلنا قبل كده؟
كريم ضحك ضحكة قصيرة وقال
لأ بس أنا أعرف عن حضرتك كتير
الجملة دي خلت ملامح شريف تتغير
بصلي بعد كده وقال
ألف مبروك يا نادية
كنت واقفة مش قادرة أتكلم
كل اللي قدرت أقوله
الله يبارك فيك
هز راسه باحترام وبعدين رجع بص لكريم
حضرتك كريم منصور؟
كريم اتفاجئ إنه عارف اسمه لكنه حاول يخبي ده وقال
أيوه أنا
شريف ابتسم ابتسامة هادية وقال
تشرفنا يا أستاذ كريم
وبعدين لف ناحية الراجل الكبير اللي كان واقف وراه وقال
أستاذ فؤاد ممكن حضرتك تتفضل؟
الراجل الكبير قرب منهم وهو شايل ملف أسود صغير
كريم أول ما شافه وشه اتغير
كانت ابتسامته اختفت تمامًا وعينيه اتسعت وهو بيبص بين فؤاد وشريف
أنا لاحظت التغيير ده لكن ماكنتش فاهمة سببه
شريف خد الملف من فؤاد وفتحه وبعدين قال بصوت واضح وصل للناس القريبة من المسرح
قبل ما نكمل أي كلام أحب أوضح إن وجودي هنا النهارده مش علشان أضايق نادية ولا علشان أعترض على جوازها أنا اتمنيتلها الخير من يوم ما انفصلنا وماليش أي حق أتدخل في حياتها
بصلي وقال
وأنا بعتذرلك لو وجودي هنا سببلك أي إحراج
حسيت للحظة إنني مش عارفة أرفع عيني من الأرض من شدة الإحراج
لكن كريم ضحك وقال
يا أستاذ شريف إحنا ناس متحضرين ومفيش أي مشكلة إن حضرتك تيجي تبارك للعروسة بس أنا بصراحة كنت متوقع رد فعل أكبر من كده
