
حسين ماسمعش حد برة عيلته بينطق الكلمات دي من يوم ما جدته توفت.
سأل بصوت واطي: “مين دي؟”
سعيد كشر وشك: “ماعرفش يا باشا.”
حسين فضل يبص على نادية وهي بتبعد خصلة شعر مبلولة عن وشها.
“اعرفلي كل حاجة عنها.”
سعيد بص له: “عن الست دي؟”
“كل حاجة!”
سعيد كان عارف حسين كويس، وعارف أن لما الفضول يتحول لأمر، يبقى مفيش مناقشة. مسك تليفونه فوراً.
نادية كانت بتسأل يونس عن اسمه لما قرب منهم راجل عريض المنكَبين.
“يونس!”
الولد بص لفوق: “عمو سعيد!” وجري ونط في حضنه.
نادية وقفت، ونفسها هدي شوية من الارتياح: “أنت تعرفه؟”
سعيد هز رأسه: “عيلته قلبوا الدنيا عليه.”
” الحمد لله.. قول لعيلته بقى إنهم مديونين لنص المحطة باعتذار، كانوا هيجيبولنا سكتة قلبية!”
سعيد ابتسم بالعافية: “عمّه حابب يشكرك بنفسه.”
“أنا أسفة جداً، متأخرة على شغلي.”
“هو نازل حالا.”
“أكيد حضرتك بتتكلم عن حد مهم جداً بس أنا فعلاً مستعجلة.”
سعيد بص ناحية الشخص اللي جاي بيشق الزحمة، وقالها: “تقدر تقولي حاجة زي كده.”
نادية بصت في الاتجاه اللي بص عليه، ولثانية تمنت لو ماكانتش بصت!
الراجل اللي كان ماشي ناحيتهم كان عبارة عن الهيبة متجسدة في إنسان.
طويل، شعره أسود وفي شعر أبيض خفيف عند الصودغين مخليه وقور جداً، البالطو بتاعه معمول بمقاس مظبوط بالملي، وملامحه هادية ومسيطرة. الناس كانت بتتفتح له طريق من غير ما ينطق ولا كلمة.
وشه ماكانش فيه أي طيبة تقليدية، كان من نوعية الرجالة اللي الأبواب بتتفتح لهم قبل ما يمدوا إيدهم حتى.
يونس صرخ بصوت عالي: “عمو حسين!”
وش الراجل اتغير.. حاجة بسيطة جداً، بس نادية لاحظتها. أكتافه نزلت نص بوصة، قطع المسافة المتبقية ووطى قدام الولد.
“أنت كويس؟ فيك حاجة؟”
“لا.”
“حد لمسك أو ضايقك؟”
“لا.”
“أنت سبت سعيد ليه؟”
يونس بص في الأرض بكسوف: “شفت القطر وعجبني.”
حسين غمض عينيه ثانية، وبعدين أخد الولد في حضنه وقفل عليه.
لمدة خمس ثواني، الراجل الشديد الهيبة ده اختفى، وماكانش فاضل غير عم حاضن ابن أخوه وخايف عليه جداً.
نادية بصت الناحية التانية.. الحاجات الخاصة دي ليها احترامها.
لما حسين وقف تاني، عينيه راحت عليها مباشرة.
عينين رمادي، وهادية بهدوء يقلق.
“أنتِ ساعدتيه.”
“كان خايف.”
“أنتِ بتتكلمي اللهجة دي كويس.” ماكانش بيسأل، كان بيقرر.
“يعني.. شوية.”
“اللي سمعته ماكانش شوية.”
نادية عدلت شنطتها: “أنا فعلاً تأخرت جداً على الشغل.”
“اسمك إيه؟”
ترددت ثانية: “نادية.”
“نادية إيه؟”
حواجبها اترفت: “هو حضرتك متعود تستجوب الغرباء اللي بيساعدوا عيلتك؟”
سعيد كح في إيده عشان يداري ضحكته، وحسين فضل باصلها بجمود.. وبعدين وفجأة، طرف بؤه اتحرك بابتسامة خفيفة:
“الغرباء اللطاف بس.”
“طب للأسف أنا شخص ممل جداً.”
لفت ناحية يونس وقالتله: “خليك جنب عمك ماشي يا بطل؟”
الولد هز رأسه: “هشوفك تاني؟”
نادية ابتسمت له: “مصر أضيق مما تتخيل.”
وراحت اختفت وسط زحمة الناس.
حسين فضل باصص لحد ما البالطو الأخضر اختفى تماماً.
بعد ثلاثين ثانية بالضبط، سعيد قال: “نادية البنهاوي.”
حسين لف له: “بسرعة كده؟”
“هي بصمت بكارت المترو عند البوابة من 23 دقيقة، والكاميرا جابت الاسم لما طلعت الكارت من البوك.”
وش حسين قسي: “ده يسوى كتير من الإهمال والتأخير على فكرة.”
“حضرتك قولتلي اعرف كل حاجة.”
“مش وهي لسة واقفة على بعد مترين مننا!”
سعيد هز أكتافه: “أهو إهمال بس بفتاكة يا باشا!”
يونس شد كُم حسين: “كانت طيبة أوي.”
حسين بص ناحية الممر اللي مشيت فيه نادية: “أيوة.”
يونس ابتسم: “أنت حبيتها.”
سعيد فجأة بدأ يبص للسقف ومصطنع المشغولية!
حسين بص لابن أخوه: “أنا ماعرفهاش اصلاً.”
“بس أنت كنت بتبرق لها.”
“يا يونس.”
“أنت بتبرق لما حاجة تعجبك!”
“أنا ببرق لما أكون شاكك في حاجة.”
الولد فكر في الكلمة ثانية وقال: “يعني أنت شاكك فيها؟”
عين حسين رجعت تتطلع على الزحمة: “أيوة..”
كان أسهل عليه يقول كده بدل ما يعترف بالحقيقة.. إنه كان شاكك في نفسه هو!
الساعة 11:32 بالليل، ملف انحط على مكتب حسين.
“نادية البنهاوي.
عندها تسعة وعشرين سنة.
مواليد المنصورة.
أمها اتوفت وهي عندها تمان سنين، ووالدها غير معروف.
دخلت دار أيتام في السنة اللي بعديها.
اتنقلت بين ست دور رعاية ومؤسسات لحد ما تمت سبعتاشر سنة.
اتخرجت من كلية الآثار جامعة القاهرة قسم ترميم.
شغالة دلوقتي في محل قديم لترميم الكتب والمخطوطات النادرة في وسط البلد، المحل يعاني مادياً.
صحيفة جنائية بيضا تماماً.
ملهاش أي معارف مشبوهين.
مافيش أي ثروة ولا ورث.




