روايات وقصص

سلفتي ارمله اماني السيد

اقبلو كل اللينكات

اتغيرت ملامحه فجأة، وقرب مني وأخد الشنطة من إيدي وحطها على السرير بعنف.
ـ إنتِ اتجننتي؟! يعني إيه تسيبي بيت جوزك وتاخدي عيالك وتمشي؟! هو أنا طردتك؟!
بصيت له بهدوء وقلت:
ـ لأ، إنت ما طردتنيش، إنت بس قررت إن مرات أخوك تاخد أوضتي، وتمسك مصروف بيتي، وتتحكم في أكلي وأكل ولادي، وتغير فرشي وتقرر نظام حياتي، وأنا المفروض أقبل كل ده عشان هي أرملة.
ـ يا سارة، أنا قلتلك مليون مرة إني بعمل كده عشان خاطر أخويا الله يرحمه، وعشان ابنه!
ـ وأنا قلتلك مليون مرة إني مش معترضة إنك تساعدها، لكن إنت مش عايز تساعدها وبس، إنت عايزني أعيش معاها في بيت واحد، وأتنازل عن خصوصيتي وراحتي وحقوقي، وكل ما أتكلم تقول إني أنانية ومش مقدرة ظروفها.
رفع صوته وقال:
ـ طب ما هي هتعيش فين؟! أسيبها في الشارع يعني؟!
ـ ما أنا ما قلتلكش سيبها في الشارع! عندها أمها، وعندها شقة ممكن تستأجرها، وإنت تقدر تساعدها في الإيجار ومصاريف ابنها، وأنا كمان ممكن أساعدها، لكن كل واحد يساعد على قد ظروفه، مش على حساب بيته ومراته وولاده.
هز رأسه بعصبية، وقال:
ـ إنتِ مش فاهمة حاجة! دي مسؤولية أخويا اللي مات، وأنا مش هتخلى عنها مهما حصل.
ـ وأنا ما طلبتش منك تتخلى عنها.
ـ أمال عايزة إيه؟!
بصيت في عينيه وقلت بوضوح:
ـ عايزاك تتجوزها.
اتجمد مكانه، وبصلي كأنه سمع كلمة مستحيل تكون طالعة من بُقي، وبعد لحظات قال:
ـ إنتِ بتقولي إيه؟!
ـ بقولك لو إنت شايف إنك مسؤول عنها بالشكل ده، وإنك لازم تبقى موجود في كل تفاصيل حياتها، وإنك مش هتقدر ترفض لها طلب، وإنها لازم تعيش معاك تحت سقف واحد وتاخد مكاني في البيت، يبقى اتجوزها يا محمود.
ـ إنتِ اتجننتي رسمي؟! دي مرات أخويا!
ـ ما أنا عارفة إنها مرات أخوك، وعارفة إنها أرملة، وعارفة إن عندها طفل محتاج رعاية، وعشان كده بقولك لو إنت شايف إن مسؤوليتك ناحيتها وصلت للدرجة دي، يبقى الجواز ارحم من إنك تحطها في بيتي وتخليني أعيش معاها كأني واحدة غريبة.
محمود ضرب كف بكف، وبدأ يمشي في الأوضة بعصبية.
ـ إنتِ إزاي تفكري بالطريقة دي؟! إزاي ييجي في بالك إني أتجوز مرات أخويا؟!
ابتسمت بسخرية خفيفة وقلت:
ـ غريبة! يعني إنت شايف إن من حقك تشيل مسؤوليتها بالكامل، وتديها أوضتي وتخليها تتحكم في مصاريف البيت، لكن لما أقولك إن ده وضع مش طبيعي ولازم يبقى ليه حدود، تتصدم؟!
ـ أنا ما قلتش إني هتجوزها، وما فكرتش في الموضوع ده أصلًا!
ـ وأنا ما قلتلكش اتجوزها غصب عنك، أنا بقولك إن أنا مش هعيش بالشكل ده، وده قراري.
قرب مني، وحاول يتكلم بنبرة أهدى، وكأنه بدأ يدرك إن الموضوع المرة دي مش مجرد خناقة وهتخلص.
ـ طب اقعدي نتكلم، وأنا هحل الموضوع. هخلي نجلاء ترجع أوضة الأطفال، ومش هخليها تتدخل في كل حاجة، بس إنتِ بلاش حكاية الشنط دي.
هزيت رأسي وقلت:
ـ لأ يا محمود، الموضوع ما بقاش موضوع أوضة، ولا حتى موضوع نجلاء. الموضوع إنك كل مرة بتاخد قرار يخص حياتنا من غير ما ترجعلي، وبعدها لما أعترض بتتعامل معايا كأني أنا اللي غلطانة. أنا مش عايزة أعيش كل يوم مستنية أشوف مين هياخد مكاني المرة الجاية.
ـ يعني هتسيبيني عشان خلاف على مصروف البيت وأوضة النوم؟!
ـ أنا هسيب البيت عشان إنت ما بقيتش شايف إن ليا فيه حق أتمسك بيه.
سكت لحظة، وبعدها قال بحدة:
ـ طيب والولاد؟! هتاخديهم وتحرميهم من أبوهم؟!
وقفت قدامه، ولأول مرة من بداية الكلام حسيت إن الغضب بدأ يتحرك جوايا، لكني سيطرت على نفسي ورديت:
ـ ما تستخدمش ولادنا عشان تمنعني آخد قرار يحفظ كرامتي. أنا ما منعتكش عنهم، ولا همنعك تشوفهم، وإنت تقدر تفضل أبوهم وتكون موجود في حياتهم، لكن أنا مش هفضل في بيت كل يوم بحس فيه إن وجودي زيادة.
ـ وإنتِ فاكرة إنك لما تمشي هتعيشي مرتاحة؟! فاكرة إن اهلك هيكفوكى إنتِ والولاد؟!
ـ أيوه، هتكفينا، وأنا بشتغل وعندي دخل، ومش هحتاج أمد إيدي لحد عشان أصرف على نفسي وعيالي.
بصلي باستنكار وقال:
ـ يعني إنتِ كنتِ مخبية عني إنك بتفكري في الكلام ده من زمان؟!
ـ أنا ما كنتش بفكر أسيبك يا محمود، أنا كنت بفكر إزاي نحافظ على بيتنا، لكن إنت كنت كل يوم بتاخد خطوة تخليني أحس إن البيت ده مش مكاني. ولما وصلت لمرحلة إني لازم أتنازل عن أوضتي عشان واحدة تانية ترتاح، فهمت إن مفيش فايدة من الكلام

تاني يوم الصبح، سارة وصلت بيت أهلها ومعاها ولادها وشنط هدومهم. أمها أول ما شافتها بالحالة دي، فهمت إن الموضوع أكبر من خناقة عادية بينها وبين محمود، لكنها ما ضغطتش عليها بالأسئلة، وسابتها تدخل الأوضة ترتاح شوية مع ولادها.

سارة كانت مقررة إنها مش هترجع البيت تاني، مش المرة دي على الأقل، لأنها تعبت من إنها كل ما تدافع عن حق من حقوقها، محمود يتعامل معاها كأنها أنانية وعايزة تحرم أخوه من الرحمة بعد موته.

طول اليوم، محمود اتصل بيها أكتر من مرة، لكنها ما ردتش عليه. ولما جه المساء، اتصل تاني، والمرة دي سارة ردت عليه.

ـ إنتِ ناوية تفضلي عند أهلك لحد إمتى يا سارة؟!

ـ مش عارفة، لما أقرر هبقى أقولك.

ـ يعني إيه مش عارفة؟! هو إنتِ سبتِ البيت ومشيتِ بجد؟! أنا كنت فاكر إنك بتعملي كده عشان تضغطِي عليا وخلاص!

ـ لأ يا محمود، أنا مشيت عشان مبقتش قادرة أعيش بالطريقة دي.

ـ يا ستي خلاص، أنا غلطت، وقلتلك هرجع كل حاجة زي ما كانت. نجلاء هترجع أوضة الأطفال، ومش هتتدخل في حاجة تخصك، وإنتِ ترجعي بيتك ونقفل الموضوع.

سارة سكتت لحظة، وبعدين ردت بهدوء:

ـ إنت لسه فاكر إن الموضوع أوضة يا محمود؟! إنت كل يوم كنت بتاخد مني حاجة، وأنا كل يوم كنت بسكت وأقول يمكن يفوق، يمكن يفهم إن ليّا حق في بيتي وحياتي. لحد ما وصلت إنك بتطلب مني أسيب أوضتي عشان واحدة تانية تنام فيها، ولما اعترضت، قلتلي اللي مش عاجبه يتكلم معاك!

ـ طب ما أنا بقولك إني هصلح كل ده! إنتِ عايزاني أعمل إيه تاني؟!

ـ أنا مش عايزاك تعمل حاجة، أنا هتصرف في حقوقي بنفسي.

ـ حقوقك إيه اللي هتتصرفي فيها؟! إنتِ بتتكلمي بطريقة تقلق!

ـ بكرة هتعرف.

ـ سارة، متلعبيش بأعصابي! أنا جوزك، ومش هقبل إنك تعاملي معايا بالطريقة دي.

ـ وإنت قبلت إنك تعاملني كأني ماليش قيمة في بيتي، وكنت مستني مني إيه؟ إني أفضل ساكتة لحد ما نجلاء تاخد مكاني بالكامل؟

ـ إنتِ بتكبري الموضوع أوي!

ـ لأ يا محمود، أنا اللي صغرت نفسي كتير عشان خاطر البيت، لكن خلاص، كل واحد هياخد حقه بالطريقة اللي القانون يسمح بيها.

قفلت سارة المكالمة، وسبته يحاول يتصل بيها تاني، لكنها المرة دي ما ردتش.

تاني يوم، راحت سارة لمحامي، وقدمت له الأوراق اللي تثبت حقوقها، وطلبت منه يبدأ إجراءات دعوى الطلاق والنفقة، ويتابع معاها موضوع قائمة المنقولات، وكمان حقها في الشقة اللي باسمها.

كانت عارفة إن الطريق مش هيكون سهل، وإن محمود ممكن يحاول يضغط عليها عشان تتراجع، لكنها كانت مستعدة تواجهه المرة دي، لأنها مش هتفضل تستأذنه عشان تاخد حقها.

بعد ما خلصت، رجعت بيت أهلها، وقعدت مع ولادها، وبعدها باسبوع بعتت لجوزها اخطار

ـ إنتِ عملتي إيه يا سارة؟!

ـ خير يا محمود؟ صوتك عالي ليه؟

ـ إنتِ بعتالي ورق من المحامي! إيه دعوى الطلاق والنفقة وقايمة المنقولات دي؟! إنتِ وصلتي الموضوع للمحاكم بجد؟!

ـ أيوه، وصلت الموضوع للمحاكم، لأن الكلام بيني وبينك مبقاش بيجيب نتيجة.

ـ يعني إيه مبقاش بيجيب نتيجة؟! أنا قلتلك هرجعك بيتك، وهحل كل حاجة!

ـ وأنا أرجع على إيه يا محمود؟ أرجع ألاقي نجلاء قاعدة في أوضتي، وماسكة مصروف البيت، وبتقرر أنا وولادي ناكل إيه ونشتري إيه؟ ولا أرجع أستنى منك قرار جديد تنفذه من غير ما تسألني؟

ـ يا سارة، أنا مش هفضل طول عمري أبررلك كل حاجة بعملها! دي أرملة أخويا، وأنا مش هتخلى عنها!

ـ وأنا ما طلبتش منك تتخلى عنها، أنا طلبت منك تحط حدود، لكن إنت رفضت، واعتبرت إن أي حاجة تخصها أهم من أي حاجة تخصني. دلوقتي أنا هاخد حقي بالقانون، ومش هستنى منك تسمحلي بيه.

محمود سكت شوية، وبعدها قال بعصبية:

ـ طب والنفقة دي كمان؟! إنتِ عايزة مني نفقة ليه؟! هو أنا كنت ببخل عليكي؟!

ـ إنت منعت عني مصروف البيت، واديته لنجلاء، وخلّيتها هي اللي تتحكم في مصاريف بيتنا، مع إن دي مسؤوليتي أنا، وأنا اللي أعرف احتياجات ولادي. المصروف اللي إنت منعتني عنه، أنا هاخده بالقانون، والقاضي هو اللي يحدد حقوقي وحقوق ولادي.

ـ إنتِ بتتكلمي كأني واحد غريب عنك! ده أنا جوزك يا سارة!

ـ ما إنت جوزي فعلًا، وده اللي يخليني أستغرب إزاي قدرت تعمل فيا كده. إنت ما احترمتش إني مراتك، ولا احترمت إن البيت ده بيتي، ولا حتى فكرت إن القرارات دي ممكن تخليني أمشي.

ـ طب والشقة؟! إنتِ كمان كاتبة موضوع الشقة في الورق؟!

ـ أيوه يا محمود، الشقة اللي إنت قاعد فيها دي شقتي، وأنا مش هسيب حقي فيها.

ـ إنتِ بتقولي إيه؟! يعني إنتِ عايزاني أسيب الشقة؟!

ـ أيوه، من بكرة عايزاكم تخلوا الشقة، إنت ونجلاء وابنها.

صوته على فجأة:

ـ إنتِ اتجننتي يا سارة؟! أخرج أنا ونجلاء والولد ونروح فين؟! إنتِ عايزة ترمينا في الشارع؟!

ـ محدش قالك ترمي نفسك في الشارع يا محمود، لكن الشقة دي ملكي، وإنت مش من حقك تقرر مين يعيش فيها وتتصرف فيها كأنها ملكك. أنا مش هفضل سايبة بيتي لحد تاني، وفي نفس الوقت قاعدة عند أهلي عشان حضرتك قررت إن مرات أخوك أهم من مراتك.

ـ بس أنا جوزك! يعني إيه تخرجيني من شقتي؟!

ـ إنت جوزي، لكن الشقة مش ملكك، وده مش كلامي أنا، دي أوراق ملكية. وبما إني مش هرجع أعيش فيها في الوضع ده، فهتابع الإجراءات القانونية عشان أسترد حقي، ومش هعمل أي حاجة خارج القانون.

ـ يعني إنتِ عايزة تطرديني من بيتي؟

ـ بيتك إنت؟! يا محمود، الشقة دي شقتي، والعفش اللي فيها عفشي، وكل ده مثبت في قايمة المنقولات. إنت اللي نسيت الكلام ده لما قررت تدي نجلاء أوضتي وتتصرف في البيت كأنك صاحبه لوحدك.

ـ طب والعفش؟! هتاخدي العفش كمان؟!

ـ العفش بتاعي، ومثبت في القايمة، وأنا هطالب بحقي فيه بالطريق القانوني. مش هتنازل عن حاجة من حقي عشان إنت تزعل، ولا عشان نجلاء تلاقي نفسها مضطرة تدور على مكان تاني.

ـ إنتِ عايزة تخليني أبدأ من الصفر يا سارة؟! إنتِ مش فاكرة العشرة اللي بينا؟!

سارة أخدت نفس طويل، وبعدين قالت:

ـ أنا فاكرة كل يوم عشته معاك يا محمود، وعشان كده استحملت كتير. فاكرة لما كنت بتاخد فلوس من غير ما تقولي عشان تساعد نجلاء، وكنت بقول معلش، دي ظروفها صعبة. فاكرة لما كنت بتدافع عنها كل ما أتكلم، وكنت بقول يمكن مع الوقت تفهم. لكن عمري ما تخيلت إنك هتوصل لدرجة إنك تطلب مني أسيب أوضتي عشان هي ترتاح!

ـ خلاص يا سارة، أنا غلطت، وأنا معترف إني غلطت! بس إنتِ كده بتضيعينا كلنا. طب استني شوية، وأنا هتصرف في موضوع الشقة، وهشوف حل مع نجلاء، بس بلاش المحاكم دي!

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى