بصيت له وأنا مش مصدقة، وقلت:
ـ إنت شايف إن ده طبيعي؟
ـ يا سارة، هي عملت إيه يعني؟ هو مش البيت بيتنا كلنا؟ وبعدين نجلاء عندها ذوق، سيبيها تغير شوية، بدل ما تفضلي مكبرة كل موضوع.
نجلاء ابتسمت، وراحت جابت له كوباية العصير اللي بتحبه، وقالت:
ـ أنا كنت عارفة إنك هتحب التغيير، أصل البيت كان محتاج شوية تجديد.
أما أنا، فدخلت أوضتي وأنا حاسة إن كل يوم بيعدّي، بيتسحب مني جزء جديد من حياتي.
لكن اللي ما كنتش أعرفه، إن تغيير الفرش كان مجرد بداية، وإن نجلاء كانت بتجهز لخطوة أكبر بكتير.
بعد يومين، محمود رجع من الشغل، وطلب مني أقعد معاه في الصالة، وكانت نجلاء قاعدة جنبه، ووشها عليه ابتسامة غريبة.
بصلي محمود وقال:
ـ سارة، أنا عايز أتكلم معاكي في موضوع مهم.
قلبي اتقبض، وسألته:
ـ خير؟
رد وهو بيحاول يظهر إن الموضوع عادي:
ـ أنا شايف إن نجلاء محتاجة مساحة أكبر، خصوصًا إن معاها طفل، وأوضة الأطفال صغيرة عليها، وإحنا عندنا الأوضة الرئيسية واسعة ومريحة، فقررت إنها تنقل فيها هي وابنها.
فضلت باصة له ثواني، وبعدين قلت:
ـ تقصد إيه بالأوضة الرئيسية؟
قال بمنتهى البساطة:
ـ أوضتنا يا سارة، أنا هخلي نجلاء تنام فيها، وإنتِ تنقلي أوضة الأولاد، لحد ما ربنا يفرجها ونشوف حل مناسب.
حسيت إن نفسي اتسحب مني، وبصيت لنجلاء، لقيتها منزلة عينيها وبتعمل نفسها مكسوفة، لكن ابتسامتها الصغيرة كانت واضحة.
ـ إنت بتقول إيه؟! إنت عايزني أسيب أوضتي وسريري وأروح أنام مع ولادي، عشان خاطرها
رد بعصبية:
ـ ما تقوليش تاخد مكانك! نجلاء أرملة يا سارة، ومحتاجة تحس بالأمان، والأوضة دي أريح ليها ولابنها، وإنتِ تقدري تنامي مع الأولاد فتره .
ـ كام شهر؟! وإنت ضامن منين إنها هتمشي بعد كام شهر؟ ما هي كل يوم بتاخد حاجة جديدة، وإنت كل مرة بتقف في صفها!
ضرب محمود كفه على ركبته وقال:
ـ كفاية بقى! أنا مش هفضل كل يوم في مشكلة بسببك، وأنا مش هسمح إنها تحس إنها أقل من مراتي أو عيالي.
بصيت له بذهول، وقلت:
ـ يعني عشان هي أرملة، لازم أنا أحس إني أقل منها؟!
وقبل ما يرد، نجلاء اتكلمت بصوت هادي، لكنه كان مليان بالاستفزاز:
ـ خلاص يا محمود، لو سارة مش موافقة، أنا ممكن أرجع عند ماما، وأنا مش عايزة أكون سبب خلاف بينكم.
كنت متأكدة إنها مش عايزة تمشي، وإنها بتقول الكلام ده عشان محمود يجري يرضيها، وده اللي حصل فعلًا.
محمود بص لها وقال بسرعة:
ـ ترجعي فين يا نجلاء؟ إنتِ مش هتتحركي من هنا، والأوضة هتبقى أوضتك من النهارده، واللي مش عاجبه الوضع يتكلم معايا أنا.
وبعدين لف ناحيتي وقال:
ـ عايزك تلمي حاجتك قبل ما أنام، عشان نجلاء هتنقل النهارده.
قمت من مكاني ببطء، وبصيت له نظرة عمري ما بصيتهاله قبل كده، وقلت:
ـ حاضر يا محمود، هلم حاجتي.
ارتاح، وافتكر إني استسلمت، أما نجلاء فقامت تدخل أوضتنا وهي بتقول:
ـ متقلقيش يا سارة دى مجرد بدايه.
دخلت أوضة النوم، وبصيت على السرير اللي قضيت عليه سنين من عمري، وعلى الدولاب اللي اخترته بنفسي، وعلى صوري مع محمود يوم فرحنا، وحسيت إن الغريب مش نجلاء اللي داخلة تاخد مكاني، الغريب فعلًا هو جوزي اللي واقف بره وبيطلب مني أتنازل عن كل ده بإرادتي.
اخدت قرارى
والمرادي، مش هكون أنا اللي هتطلب منهم يسيبوني في حالي… هما اللي هيمتنوا ده
دخلت أوضة النوم، وقفلت الباب ورايا، ووقفت أبص على الهدوم اللي كنت لسه مرتباها في الدولاب من كام يوم، قبل ما محمود يقرر إن حتى الأوضة اللي بنام فيها مش من حقي أختار مين يشاركني فيها.
ما عيطتش، ولا حسيت إني محتاجة أعاتبه للمرة المليون، لأن فيه لحظة بيوصل فيها الإنسان لمرحلة بيبطل فيها يزعل من اللي بيحصل، وبيبدأ يفكر إزاي يخرج نفسه من الدائرة دي نهائيًا.
فتحت الدولاب، وطلعت شنطة سفر كبيرة، وبدأت أحط فيها هدومي وهدوم ولادي، وبعدها دخلت الحمام وجمعت حاجتي الشخصية، ولميت أوراقي وأوراق الولاد من الدرج، وحطيتها في ملف صغير.
كنت بعمل كل ده بهدوء شديد، لدرجة إن محمود لما دخل الأوضة، وقف عند الباب مستغرب من المنظر.
ـ إنتِ بتعملي إيه يا سارة؟
قفلت الشنطة، ورفعتها من على السرير، ورديت من غير ما أبصله:
ـ زي ما إنت شايف، بلم هدومي.
قرب مني، وبص على الشنطة، وبعدها رجع بصلي.
ـ بتلمي هدومك ليه؟ مش إنتِ وافقتي تنقلي أوضة الولاد؟ إيه اللي حصل تاني؟
حطيت الشنطة على الأرض، وبدأت أجهز شنطة تانية، وقلت ببرود:
ـ غيرت رأيي، مش هنقل أوضة الولاد، أنا هسيب البيت كله.
فضل باصصلي كام ثانية، وكأنه مستوعبش الجملة اللي قلتها، وبعدها ضحك ضحكة قصيرة وقال:
ـ إنتِ بتهزري يا سارة؟
ـ لأ، مش بهزر.
ـ يعني إيه هتسيبي البيت؟! إنتِ رايحة فين؟!
ـ عند اهلى ، هروح أعيش معاهم أنا وولادي.
