
خرجوا من الفيلا، وقال خالد بغضب:
— انت ازاي تسيبه يبيع ويشترى فينا كده؟ انت هتسكتله؟
صابر بغضب:
— ما انت لو كنت راجل كان جدك جوزهالك، لكن فاشل ومكملتش تعليمك، حتى الأرض مش واخد بالك منها.
كريمة:
— انت هطلع غلبك في الواد، اتصرف وشوف هتعمل إيه في المصيبة دي.
أخذت شادية الجواب من آدم وصعدت لحياة بغرفتها وقالت:
— جدك كتب الجواب ده قبل ما يموت.
أخذت الجواب بسرعة وفتحته:
“حفيدتي حياة،
ما دام الجواب معاكي وبتقريه، يبقى أنا قابلت وجهه كريم. عارف الكلام اللي هقوله صعب عليكي، بس مكنش قدامي حل غيره. أنا جوزتك آدم ابن عمك، هو هياخد باله منك لحد ما تخلصي تعليمك وتشتغلي ويجيبلك حقك من عمك وابنه. متخافيش منه، آدم راجل وهيحافظ عليكي، وهيطلقك لما كل حاجة ترجعلك. متزعليش يا حياة، أنا خايف عليكي.
جدك الشاذلي”
صُدمت حياة من رسالة جدها، ظلت تبكي وتبكي، ولكن قالت والدتها:
— متخافيش يا حياة، آدم راجل، وهياخد باله مننا، وهياخدنا نعيش معاهم في القاهرة.
حياة:
— صعب عليا اللي بيحصل ده، بس عشان جدي أنا هعمل أي حاجة كان عايزها عشان ميزعلش مني.
قبلت رأسها وقالت:
— يلا يا بنتي لمي هدومك عشان هنسافر معاه.
فعلت حياة ما طلبته والدتها، وبالفعل أنهوا كل شئ.
كان آدم ينتظرهم أمام السيارة. كانت هذه أول مرة يرى بها حياة، فآخر مرة كانت طفلة. كانت جميلة ورقيقة رغم علامات التعب الظاهرة عليها، لكن عيونها الخضراء مع حجابها لفتت إعجابه. فتنحنح وحمل منهم الشنط وجلس بجوار السائق، وجلست حياة مع والدتها.
وصلوا للقصر فوجدوا خديجة تنتظرهم، سلمت على شادية وقالت:
— البقاء لله يا حبيبتي.
شادية:
— ونعم بالله يا خديجة، سلمي يا حياة على مرات عمك.
ابتسمت لها حياة فضمّتها لحضنها ودخلوا للقصر.
كانت عاليا وزوجها مراد وأحمد شقيقهم الأصغر ينتظرونهم، وسلموا عليهم جميعًا، وأوصلتهم خديجة لغرفتهم وقالت:
— أنا مش عيزاكي تفهمينى غلط يا شادية، بس محدش يعرف بجوازهم غيري.
شادية:
— بتفهم عين العقل، متقلقيش، ومحدش هيعرف خالص، احنا عارفين إنه خاطب، ربنا يكرمه يا رب.
خديجة:
— ربنا يخليكي يا شادية، هسيبكو ترتاحوا، بعد إذنكو.
حياة:
— شكلهم طيبين أوي.
شادية:
— الحمد لله يا بنتي، جدك سلمنا لإيد أمينة، الله يرحمه، احنا هنا عشان آخر سنة ليكي في الكلية، وبعدين تاخدي حقك ونعيش لوحدنا يا بنتي.
حياة:
— إن شاء الله يا ماما.
بالأسفل كانت عاليا تتحدث مع آدم:
— شكلها طيبة أوي وباين عليها الحزن على جدو الله يرحمه.
آدم:
— أكيد، ماهو اللي رباها بعد عمك مامات، كان كل حاجة ليها.
عاليا:
— بس تفتكر ليه جدو طلب تعيشوا معانا هنا؟
آدم:
— عاليا، مش وقته، هحكيلك بعدين، المهم تاخدي بالك منهم ومن حياة لأنها متعرفش حد.
عاليا:
— متقلقش يا حبيبي.
أحمد:
— أنا مش مصدق نفسي، أنا يبقى عندي بنت عم قمر كده ومعرفش؟ ياريتني سمعت كلامك يا جدي وكنت سافرت.
آدم بغضب:
— أحمد، ملكش دعوة بيها، دي محترمة مش زي الأشكال اللي انت تعرفها، مفهوم؟ ولو عرفت إنك ضايقتها هتزعل من رد فعلي.
تدخل مراد وقال:
— اهدى يا آدم، يعني انت مش عارف أحمد، أكيد بيهزر.
أحمد مدافعًا عن نفسه:
— أنا آسف يا آدم، والله أنا بهزر، وكفاية إن جدو الله يرحمه موصينا عليهم.
قطع حديثهم نزول حياة، ذهبت إليها عاليا وقالت:
— نورتي يا حياة، والله لو تعرفي كان نفسي أتعرف عليكي من زمان والله.
حياة:
— أنا كمان، جدو حكالي عنكو كتير، ومبسوطة إني معاكو.
دخلت خديجة وشادية لإخبارهم بتجهيز العشاء.
عند الانتهاء نظرت حياة لآدم وقالت:
— بشمهندس آدم، ممكن أتكلم مع حضرتك؟
آدم:
— أكيد طبعًا، اتفضلي.
وذهب معها لمكتبه.
حياة:
— أنا متشكرة جدًا على وقفتك معانا، وأوعدك إن محدش هيعرف حاجة عن جوازنا، وأوعدك أول ما هاخد حقي من عمى هاخد والدتي ونمشي.




