
حسام بص لها بصدمة: «يعني إنتِ عملتي كده عشان كلمة قلتها وأنا فرحان بمراتي؟»
قالت وهي بتعيط: «أنا كنت حاسة إنك بقيت شايفها أحسن مني، وإن كل حاجة في البيت بقت ليها».
رد عليها: «وده يديكي الحق تكسريها وتضيعي تعبي قدام زمايلي؟»
والدة حمزة كانت قاعدة ساكتة، لكنها بدأت تبص لسماح بطريقة مختلفة.
وبعد لحظات قالت: «يا بنتي، أنا مش جاية أحكم عليكي، بس اللي عملتيه مش بسيط. الست دي مرات أخوكي، والمفروض تكوني أختها، مش سبب وجعها».
سماح نزلت عينيها في الأرض.
حمزة قال بهدوء: «أنا كنت فاكر إن البيت اللي هدخل منه هيكون فيه احترام بين أهله، لأن اللي مش بيحترم مرات أخوه، ممكن في يوم ما يحترمش مراته».
سماح بصت له بسرعة وقالت: «يعني إيه الكلام ده؟»
قال: «يعني أنا محتاج أفكر، ومش هقدر أكمل خطوة الجواز قبل ما أفهم أنا داخل على إيه».
والدته قامت وقالت: «إحنا هنستأذن دلوقتي، وربنا يكتب الخير للجميع».
سماح قامت بسرعة، ووشها بقى شاحب.
قالت: «يا طنط، استني، إحنا لسه ما اتكلمناش في الشبكة».
الست بصتلها وقالت: «الشبكة مش أهم من الأخلاق يا بنتي».
وخرجت هي وابنها.
أول ما الباب اتقفل، سماح انفجرت في العياط.
قالت لحسام: «إنت فضحتني! إنت ضيعتلي جوازي!»
حسام رد عليها: «أنا ما ضيعتش حاجة، إنتِ اللي ضيعتي ثقة الناس فيكي».
وبعدين بص لها وقال: «إنتِ فاكرة إن اللي حصل يوم العزومة عدى؟ إنتِ فاكرة إن مرات أخوكي نسيت اللي عملتيه فيها؟»
سماح صرخت: «هي اللي كانت السبب! من يوم ما دخلت البيت وإنت مش شايف غيرها!»
الكلمة دي خلت حماتي تقوم من مكانها وتقول: «سماح! عيب!»
لكن سماح كانت خلاص فقدت السيطرة على نفسها.
قالت: «أيوه، أنا اللي عملت كده، وأنا اللي حطيت الشعر في الفطيرتين، وأنا اللي نزلت الصواني قدام الضيوف! كنت عايزة أخليها تكره اليوم اللي دخلت فيه بيتنا!»
ساد صمت رهيب.
حسام بص لها وكأنه مش مصدق إنها اعترفت أخيرًا.
وأنا كنت واقفة عند باب المطبخ، ودموعي نازلة من غير صوت.
حسام قرب مني وقال: «سمعتي؟ أنا آسف يا حبيبتي، سامحيني».
لكن سماح أول ما شافتني قالت: «إنتِ مبسوطة دلوقتي؟ خربتيلي حياتي!»
بصيت لها وقلت بهدوء: «أنا ما خربتش حياتك يا سماح، أنا ما عملتش غير إني سكتّك تسمعي الناس الحقيقة اللي إنتِ بنفسك اعترفتي بيها. إنتِ اللي ظلمتيني، وإنتِ اللي استكترتي عليا أفرح بجوزي وبيتي».
قربت منها خطوة وكملت: «أنا كنت ممكن أعدي اللي حصل، وممكن حتى أسامحك لو كنتي جيتي واعتذرتي، لكن إنتِ سيبتيني شهر كامل أتحمل نظرات جوزي وكلام الناس، ولا فكرتي حتى تقولي كلمة حق».
سماح فضلت تعيط وتقول: «أنا آسفة.. والله ما كنت متخيلة إن الموضوع هيوصل لكده».
قلت لها: «وإنتِ ما كنتيش متخيلة إن اللي بتعمليه في الناس ممكن يرجعلك؟»
حماتي قربت مني وقالت: «حقك عليا يا بنتي، أنا غلطت لما سكتّ ومسمعتش منك».
بصيت لها وقلت: «أنا مش زعلانة منك قد ما أنا زعلانة إنك كنتي شايفة بنتك بتظلمني وساكتة».
حسام مسك إيدي وقال: «أنا مش هسيب الموضوع يعدي كده، أنا عايز أصلح كل حاجة».
لكن المفاجأة إن سماح ما اكتفتش بالاعتذار، وفضلت طول الليل قاعدة في أوضتها بتعيط، ولما الصبح طلعنا لقيناها مش موجودة.
حماتي قالت إنها خرجت من بدري، وإنها مش عارفة راحت فين.
حسام اتصل بيها كذا مرة، لكنها ما ردتش.
وبعد الظهر رجعت، وكانت عينيها وارمة من العياط، وفي إيدها شنطة صغيرة.
دخلت الصالة، وبصتلي وقالت: «أنا جاية أقولك حاجة، ومش عايزة حد يقاطعني».
حسام قال: «اتكلمي».
سماح بصتلي وقالت: «أنا عارفة إن الاعتذار مش هيرجع اللي فات، وعارفة إني جرحتك، بس أنا طول عمري كنت بحس إني أقل من غيري، وكل ما أشوف حسام بيشكر فيكي كنت بحس إنه نسي إني أخته. ولما قال قدامنا إن محدش يحط إيده معاكي، حسيت إنه بيقلل مني».
رديت عليها: «كان ممكن تتكلمي معاه، كان ممكن تقولي إن الكلمة ضايقتك، لكن إنتِ اخترتي تكسري إنسانة ملهاش ذنب».
هزت راسها وقالت: «عارفة، ومش هطلب منك تسامحيني دلوقتي. أنا بس عايزة أقولك إن حمزة اتصل بيا الصبح، وقال إنه مش هيكمل الموضوع».
حماتي حطت إيدها على قلبها وقالت: «يا بنتي!»
سماح كملت: «قال إنه مش عايز يتجوز واحدة شايفة إن نجاحها لازم يكون على حساب كرامة غيرها. وأنا حاولت أفهمه إن الموضوع كان لحظة غضب، لكنه قاللي إن اللي بيعمل حاجة في لحظة غضب، لازم يتحمل نتيجتها».
وبصتلي وقالت: «أنا كنت فاكرة إنك لما تتأذي أنا هفرح، لكن لما لقيت نفسي خسرت كل حاجة، فهمت إني كنت غلطانة».
أنا سكت شوية، وبعدها قلت: «يا سماح، أنا مش هفرح في وجعك، ولا أتمنى لك الشر. بس لازم تعرفي إن الاعتذار مش معناه إن كل حاجة ترجع زي الأول في ثانية. الثقة بتتبني من جديد، وده محتاج وقت».
قالت: «أنا موافقة».
ومن اليوم ده، بدأ البيت يتغير.
حسام رجع يتعامل معايا زي الأول، وبقى يحاول يعوضني عن الشهر اللي فات. وفي يوم رجع من الشغل ومعاه علبة حلوى كبيرة، وحطها قدامي وقال:
«دي عشان أحلى ست في الدنيا، وعشان أنا وعدتك إني مش هحكم عليكي تاني من غير ما أسمع منك».
ضحكت وقلت: «طب ما تدوق الفطير الأول عشان تتأكد إني لسه بعرف أعمله».
ضحك وقال: «ده أنا مستعد آكل صينية كاملة لوحدي».
أما سماح، فابتدت تتغير واحدة واحدة. في الأول كانت بتتعامل معايا بحذر، وبعدها بقت تسألني عن حاجات في المطبخ، وتطلب مني أساعدها في اختيار لبسها، وتشاركني في تجهيز الأكل.
لكن أنا ما رجعتش أتعامل معاها بنفس الثقة القديمة، وده كان حق طبيعي ليا.
بعد حوالي أسبوعين، كنت في المطبخ بعجن فطير جديد، دخلت سماح ووقفت جنبي.
قالت: «ممكن أتعلم منك؟»
بصيت لها وابتسمت: «طبعًا».
غسلت إيديها ووقفت جنبي، وبدأت أشرح لها إزاي تعجن وإزاي تسيب العجين يرتاح، وإزاي تفرد الطبقات واحدة واحدة.
كانت كل شوية تسألني: «طب كده كويس؟»
وأنا أرد: «لأ، لسه شوية».
وفي وسط الكلام قالتلي: «عارفة يا مرات أخويا، أنا يوم العزومة كنت شايفة إنك واخدة مكان مش مكانك، لكن دلوقتي فهمت إن كل واحد ليه مكانه، ومفيش داعي إننا نقلل من بعض عشان نحس إننا مهمين».
بصيت لها وقلت: «ربنا يهديكي يا سماح، ويكتبلك الخير».
بعدها بشهرين، حسام قرر يعمل عزومة تانية لمديره وزمايله، وقال لي: «إيه رأيك نعمل الفطير اللي بيحبه المدير؟»
بصيت له وضحكت: «المرة دي هنعمله أنا وسماح سوا».
حسام ابتسم وقال: «بس بشرط، أنا اللي هحط الصينية على السفرة».
ويوم العزومة، سماح كانت واقفة جنبي من الصبح، بتساعدني وتجهز معايا، ولما الضيوف وصلوا، خرجنا بالفطير.
المدير أول ما شافه قال: «أهو ده الفطير اللي كنت مستنيه!»
وداق منه قطعة، وبعدها بص لحسام وقال: «مراتك إيدها تتلف في حرير، لازم تشكرها».
حسام بصلي بفخر وقال: «دي مش بس بتعرف تعمل فطير، دي صاحبة فضل عليا في حاجات كتير».
سماح كانت واقفة جنبنا، وابتسمت وقالت: «وأنا كمان اتعلمت منها حاجات كتير».
المدير ضحك وقال: «يبقى المرة الجاية تعملولنا عزومة أكبر».
وفي اللحظة دي حسيت إن ربنا عوضني عن اللي فات، مش بالانتقام، لكن برجوع حقي وكرامتي.
أما سماح، ففضلت فترة طويلة من غير ما يدخل بيتنا عريس تاني، وكانت كل ما حد يسألها عن سبب انتهاء موضوع حمزة، تسكت وما تقدرش تحكي.
وفي يوم، قعدت جنبي وقالت: «تفتكري ربنا ممكن يعوضني؟»
مسكت إيديها وقلت: «طبعًا، بس أهم حاجة تتعلمي من اللي فات، ومتخليش غيرتك من حد تخليكي تظلميه».
بعد فترة، اتقدم لها عريس تاني عن طريق واحدة معرفة حماتي، وكان راجل محترم، وعنده شغل ثابت، وأهم حاجة إنه كان بيدور على بنت أصول.
المرة دي سماح ما اتكلمتش عن نفسها كتير، ولا حاولت تقلل من حد، ولما والدته سألتها عن شغل البيت، قالت بكل صراحة: «أنا لسه بتعلم، بس عندي استعداد أتعلم، ومش عيب إني أستفيد من اللي حواليا».
والغريب إن حماتي بصتلي وهي بتبتسم.
عدت الأيام، وتمت الخطوبة، وبعدها الجواز، وفي يوم فرح سماح، كنت واقفة جنبها بظبط طرحتها.
بصتلي في المراية وقالت: «فاكرة يوم الفطير؟»
ابتسمت وقلت: «صعب أنساه».
قالت ودموعها لمعت: «أنا كل ما أفتكر اللي عملته فيكي بحس إني كنت قاسية أوي. إنتِ كان ممكن ترديلي الأذى بأذى أكبر، لكنك اخترتي تسيبي الحقيقة تظهر».
قلت لها: «أنا كنت عايزة حقي، ومكنتش عايزة أخسر نفسي وأنا باخده».
حضنتني وقالت: «سامحيني على كل مرة ضايقتك فيها».
المرة دي حضنتها بصدق، وقلت: «ربنا يسعدك ويهدي بالك».
وفي آخر الفرح، وأنا راجعة مع حسام، قال لي: «عارفة إيه أكتر حاجة اتعلمتها من اللي حصل؟»
قلت: «إيه؟»
قال: «إن الإنسان ممكن يتكسف من ضيوفه، وممكن يخسر ترقية أو فرصة، لكن أصعب حاجة إنه يظلم أقرب الناس ليه ويسيبهم لوحدهم وقت ما يكونوا محتاجين له».
بصيت له وقلت: «وأنا اتعلمت إن السكوت مش دايمًا ضعف، وإن الحق ممكن يتأخر، لكنه لما يظهر بيكون أقوى من أي كلام».
رجعنا البيت، ولقيت على السفرة طبق فطير مشلتت صغير، وسماح كانت سايباهولي قبل ما تمشي.
كان جنبه ورقة مكتوب فيها:
«لأحلى مرات أخويا، حقك عليا، وشكرًا إنك علمتيني إن الأصول مش في المكان اللي اتولدنا فيه، الأصول في القلب والتربية».
قعدت قدام الطبق، وابتسمت.
وأكلت قطعة فطير وأنا بفتكر اليوم اللي كنت فيه قاعدة على الأرض بعيط من الظلم، واليوم اللي رجعت فيه كرامتي قدام نفس الناس اللي اتجرحت قدامهم.
وعرفت إن أكبر مكسب ليا ما كانش إن سماح خسرت عريسها الأول، ولا إنها اتكسفت من اعترافها، لكن إن جوزي عرف الحقيقة، وإن البيت اللي دخلته غريبة بقيت فيه صاحبة كرامة ومكانة.
ومن يومها، كل ما سماح تيجي تزورنا وتشم ريحة الفطير، تضحك وتقول:
«بالراحة عليا، أنا بقيت بخاف من صواني الفطير!»
فنضحك كلنا، لكن عمرنا ما نسينا الدرس اللي اتعلمناه في الليلة دي…
اللي يستر على غيره مش ضعيف، واللي يظلم الناس عشان يرضي غروره، لازم يعرف إن الحقيقة مهما اتأخرت، ليها يوم وهتظهر.
اللهم صلِّ وسلم وبارك على سيدنا محمد.
بعد ما سماح اتجوزت، كنت فاكرة إن كل حاجة خلاص انتهت، وإن اللي فات بقى مجرد ذكرى هنفتكرها ونضحك عليها، لكن الأيام كان مخبية لينا موقف تاني، موقف خلاني أفهم إن الاعتذار الحقيقي مش كلمة بتتقال، وإن الإنسان ممكن يتغير فعلًا لما يواجه نتيجة تصرفاته.
عدى حوالي تلات شهور على جواز سماح، وكانت كل ما تيجي تزورنا تجيب معاها حاجة حلوة، وتقعد معايا في المطبخ شوية، وبدأت علاقتنا تتحسن بالتدريج. حتى حماتي بقت تعاملني بطريقة مختلفة، وبقت لما حد من قرايبنا يمدح أكلي تقول بكل فخر: «دي إيد مرات ابني، ربنا يباركلها».
وفي يوم، حسام رجع من الشغل متغير، وشايل هم كبير على وشه. دخل البيت، سلم عليا، وقعد من غير ما يغير هدومه.
سألته: «مالك يا حسام؟ في حاجة حصلت؟»
قال: «مديري في الشغل طلب مني أروح معاه اجتماع مهم بكرة، وفيه فرصة إني أترقى مرة تانية، بس المشكلة إن الاجتماع هيكون في وجود ناس من الإدارة الكبيرة، وأنا مطالب أجهز ضيافة بسيطة ليهم».
ابتسمت وقلت: «وبعدين؟ دي حاجة تفرح، وأنا أجهزلك كل اللي إنت عايزه».
بصلي وقال: «أنا عارف إنك هتعملي كده، بس أنا مش عايز أتعبك».




