اخت جوزي رمت الفطير المشلتت اللي أنا عملاه قدام ضيوف جوزي وقالتلي: «ده كله شعر يا مقرفة!» والضيوف اتقرفوا ومشيوا من غير ما يدوقوا لقمة، وجوزي كان هيطلقني بسبب اللي حصل. لكن بعد شهر جه عريس لأخته، واللي عملته يومها خلاها تندم ندم عمرها، وتتمنى لو إنها ما كانتش اتولدت قبل ما تعمل فيا اللي عملته!
أنا واحدة ست على قد حالي، جيت من الأرياف على بيت عيلة في القاهرة. جوزي حسام هو اللي أصر يتجوزني، مع إن أهله مكنوش طايقين الهوا اللي بتنفسه.
حمايا الله يرحمه كان متوفي، وماقعدش في البيت غير أمه وأخته سماح. حماتي كانت في حالها، بس كان باين في عينيها إنها شايفة نفسها عليا عشان أنا بنت فلاحين. أما سماح بقى، فكانت قصة تانية.. كانت شيطان في هيئة بني آدم، مبتفوتش فرصة إلا وتعمل فيها مشكلة من مفيش، وكانت بتدور على أي خرم إبرة عشان تكرهني في البيت كله.
لحد ما جه اليوم اللي حسام دخل فيه البيت ووشه منور والفرحة مش سايعاه، وقالي إن مديره في الشغل رقاه، والمدير نفسه طلب منه الحلاوة، وقال إنه بيموت في الفطير المشلتت اللي كان حسام بيجيبه المكتب زمان لما كنت بديله منه.
حسام عزم المدير وكذا واحد من زمايله على العشاء، وقالهم هياكلوا أحسن فطير مشلتت من إيدي.
وصاني بجد وبقى يقولي اتوصي جامد، وقالي بالحرف الواحد: «اتوصي بالفطير ومتخليش حد يحط إيده معاكي عشان يتظبط».
كلمة قالها بعفوية من غير ما يقصد أي حاجة، وكان كل قصده إني عشان من الأرياف فبعرفه على أصوله. بس الكلمة دي نزلت على ودن سماح زي القنبلة!
اتعفرتت واتجننت، وقالت بعد ما جوزي مشي: «هو جوزك يقصد إيه بمحدش يشتغل معاكي؟ هو إحنا مبنعرفش نعمل ولا إيه؟ مبسوط قوي إن مراته فلاحه؟»
رغم قلة أدبها بس قلت عديها، وقلتلها: «ده بس قصده إني أنا متعودة عليه».
قمت من الفجر يوم العزومة، وطلعت أحسن ما عندي. عجنت وفردت وسويت أحسن وأطرى فطير، بمنتهى النظافة، والريحة كانت جايبة آخر الشارع.
ووسط ما أنا بشتغل، دخلت عليا سماح، وقالت بكل برود: «اعملي حسابي في فطيرتين ليا أنا وماما، بعيد عن بتوع الضيوف عشان نتغدى بيهم».
أنا استغربت، بس قلت لنفسي يمكن دي بشارة خير عشان أول مرة تطلب مني حاجة بنفسها. ابتسمت وقلت لها: «من عيوني يا سماح، الفطير كله ليكي إنتِ وماما».
وطلعت فعلًا فطيرتين زي اللوز وشيلتهم ليهم على جنب.
الليل جه، والضيوف وصلوا.. ولما جه وقت الأكل، رصيت الصواني والسفرة وكانت منورة والريحة تجنن.
الضيوف دخلوا وقالوا الله ينور، وقاموا يغسلوا إيديهم في الحمام.
وفي اللحظة دي، نزلت سماح جري من فوق، وراحت رمت الفطير على الترابيزة بكل غل وغضب، وصرخت بصوت عالي وقالت:
«الله يقرفك يا شيخة! إنتِ هتدي الفطير ده للناس؟ ده كله شعر! يا مقرفة، سديتي نفسي الله يقرفك!»
أنا اتسمرت مكاني وبصيت لها وأنا مش مصدقة اللي بتعمله ولا بتقوله!
وفي نفس اللحظة دي، كان الضيوف طالعين من غسيل الأيدي وراها على طول.. سماح أول ما شافتهم عملت نفسها متفاجئة وقالت بارتباك مصطنع: «أنا.. أنا مكنتش أعرف إن ضيوفك جم يا أبيه! سوري حقكم عليا!»
حسام اتفاجئ واتكسر قدام زمايله وبقى في نص هدومه.. الضيوف بصوا للأكل بشمئزاز، وكان فعلًا باين على الفطير اللي نزلته شعر أسود كتير.
قالوا بكسوف: «معلش يا حسام نبقى نيجي مرة تانية، ملناش نفس خالص».
ومشيوا من غير ما ياكلوا لقمة واحدة.
حسام من شدة الكسوف والغضب محاولش يوقفهم، وهز راسه وسكت لحد ما خرجوا.
أول ما قفل الباب، بص للفطير اللي نزلته أخته، لقى فعلًا الكارثة قدامه، فانفجر فيا زي العاصفة وصرخ في وشي: «إنتِ كسفتيني كسفة عمري! بهدلتيني قدام زمايلي! إزاي تعملي كده؟!»
فضلت أعيط وأحلف له وأقوله والله العظيم الفطير كان أبيض ونضيف وزي الفل، بس طبعًا من كتر الصدمة والكسفة مصدقنيش ولا سمعني.
العصبية كانت عامياه، وساب البيت وخرج بغضب، وسابني واقفة مكسورة.
وسماح طلعت على أوضتها وهي ميتة على روحها من الضحك، وهي ماسكة في إيدها فطيرة نضيفة من بتوع الضيوف وطلعت بيها!
قضيت الليل كله قاعدة على الأرض بعيط وببص لتعبى ومجهودي، وبدأت أفتش الفطير اللي اترمى واحدة واحدة.. لقيت إن الفطيرتين بتوع سماح وحماتي بس هما اللي كان فيهم شعر، وباقي الفطير اللي نزل قدام الضيوف كان نضيف وزي الفل!
وفهمت كل لعبتها الوسخة، وعرفت إنها طلبت الفطيرتين عشان تعمل بيهم النمرة الوسخة دي!
فات شهر كامل على الليلة دي، شهر أسود حسيت فيه إني غريبة في بيتي. حسام كان بيكلمني للضرورة وبس، ونظرات الكره والكسوف منه كانت دابحة قلبي، وحماتي ولا فتحت بوقها كأن بنتها ما عملتش جناية!
حتى جوزي معاتبش أخته، كان فاكر إنها فعلًا متعرفش إن الناس جم.
لحد ما في يوم.. جه عريس لسماح!
كان قاعد هو وأمه في الصالون ومبسوطين، وبيتناقشوا في كل تفاصيل الجواز والشبكة. وسماح كانت طايرة من الفرحة، لابسة أحسن ما عندها وقاعدة بغرور وفرحة هي وأمها.
وأنا واقفة في المطبخ براقبهم من بعيد.. بصيت عليهم، حسيت بنار في صدري، وجه في بالي فكرة ممكن تخليني أخسر حسام للأبد!
بس وقتها مكنش عندي أي مانع أخسر أي حاجة وأبيع الدنيا.. المهم آخد حقي، وأرد لها القلم قلمين، واللي عملته فيها خلاها تتمنى لو ما كانتش اتولدت قبل ما تعمل عملتها الوقحة!
