نادين لفّت لي وقالتلي بثقة وتحدي: «يا حبيبتي أنتِ شكلك تعبتي النهاردة في عزومة بابا، إيه رأيك تروحي ترتاحي؟ وأنا وكريم هنروح شقتنا عشان ورانا حسابات قديمة لازم نقفلها النهاردة.»
كنت عايزة أصرخ، عايزة أقول لها أنتِ بتعملي إيه في أخويا؟ لكن نظرة القلق اللي في عين كريم كانت بترجاني أسكت وما أعملش مشكلة دلوقتي.
مشيت وأنا عقلي هيطير من التفكير. الواقعة بتاعة سامح؟ نادين؟ التحذير؟ والتعلق الشديد اللي كنت شايفاه منها… ده مطلعش حب ولا اهتمام! ده كان «حراسة»! كانت قلقة يسيبها أو بيتكلم، أو قلقة إن كريم يفتكر حاجة تخص واقعة سامح!
تاني يوم الصبح، مكنتش قادرة أنام. اتصلت بكريم عشان أفهم بقية القصة، لكن تليفونه كان مقفول.
طلعت شقتهم فورًا ودقيت الباب.
فتحتلي نادين وهي لابسة وهتروح في حتة، وقالتلي ببرود: «كريم مش جوة يا حبيبتي، نزل من بدري.»
قلتلها بثبات حاولت أتصنعه: «نزل فين وتليفونه مقفول ليه؟»
ابتسمت وقالتلي: «نزل يقابل واحد صاحبه… قصدي، نزل يخلص موضوع قديم كان مفتوح من سنتين. ومتقلقيش عليه، أنا معايا جي بي اس على تليفونه وعارفة هو خطوة بخطوة فين.»
في اللحظة دي، جالي إشعار على تليفوني أنا… رسالة من رقم غريب، فيها تسجيل صوتي!
فتحت الرسالة بسرعة واستخبيت بعيد عن نادين، شغلت التسجيل، وكان صوت كريم وهو تتقطع أنفاسه وبيهمس بقلق:
«لو سمعتي التسجيل ده يا أختي… يبقى نادين كشفتني. السر اللي بتخبيه نادين مش إنها كانت خطيبة سامح… السر إن سامح ليلة الواقعة كتب مذكرات ومستندات بتثبت إنها…»
وفجأة قطع الصوت بصوت ارتطام جامد وصراخ كريم، وبعدها الصوت اتقطع تمامًا! حصري علي روايات واقتباسات
وقفت متسمرة في مكاني، والتليفون هيقع من إيدي، ولما لفيت وشي… لقيت نادين واقفة ورايا بالظبط، ماسكة في إيدها مفاتيح عربية كريم، وابتسمت وقالتلي بصوت وطي خالص:
«سمعتي التسجيل صح؟ طب يلا بينا بقى عشان تطلعي معانا المشوار ده… كريم مستنينا تحت!»
