طلعت تليفوني وقلت للقاضية يا فندم، معايا إذن من النيابة بتسجيل المكالمات عشان جوزي كان بيضايقني، ومعايا تسجيل ليه وهو بيقول لأمه انه هيلبسني قضية اني مجنونة عشان ياخد الولاد والبيت، ومعايا تسجيل تاني لحماتي وهي بتقوله قول إنها بتقسو عليهم، قول كده في المحكمة
وش حماتي بقى أصفر.
القاضية قالت قدمي التسجيلات
شغلت تسجيل واحد بس، كان صوت جوزي بيقول يا ماما متقلقيش، هقول انها عصبية وبتزعق للولاد، والقاضي هيصدقني عشان هي معهاش محامي، هي مفكرة نفسها لسه بتعرف تتكلم، دي بقالها 7 سنين مبتفتحش كتاب قانون
الصوت كان واضح جدا في القاعة.
القاضية بصت لجوزي وقالت هل هذا صوتك؟
جوزي سكت.
المحامي بتاعه حاول ينقذ الموقف وقال حتى لو، ده كلام في لحظة غضب
قلت لا يا متر، ده تخطيط، والتخطيط بان انه كاتب في ورقة الطلاق اني مليش أي حقوق وان الولاد معاه وان البيت بتاعه، وهو ناسي ان البيت ده باسمي، باسمي أنا، عشان أنا اللي دافعة مقدمه من ورث أبويا، ومعايا العقد
طلعت عقد البيت.
المحامي مسك دماغه.
حمايا قام وقف وقال انتي كنتي مخططة لكل ده؟ انتي كنتي بتمثلي علينا انك ست بيت غلبانة؟
قلتله لا، أنا كنت ست بيت بجد، بس ست بيت ذكية، وعمري ما نسيت اني محامية، أنا بس كنت سايبة القانون على جنب عشان أعيش جواز، بس انتوا اللي رجعتوني للمحكمة، انتوا اللي ضحكتوا عليا أول ما دخلت، فاكر ضحكتك وانت داخل؟ كنت بتضحك عشان فاكرني مش هعرف أتكلم، دلوقتي مين اللي مش عارف يتكلم؟
القاضية خبطت بالمطرقة وقالت كفاية، سمعت كفاية
بصت لجوزي والمحامين بتوعه وقالت القضية دي مش بسيطة زي ما كنتوا فاكرين، الست دي معاها عقود وتسجيلات وكشوف حساب، وانتوا معاكم كلام مرسل، أنا هأجل القضية أسبوعين لمراجعة الأوراق، وفي خلال الأسبوعين دول، أنصح الأستاذ انه يحاول يحل ودي، عشان لو كملنا بالطريقة دي، هو اللي هيخرج من غير حقوق
خرجت من القاعة وانا ماسكة شنطتي، وكل الناس بتبص عليا، وحمايا وحماتي قاعدين مصدومين، وجوزي قاعد حاطط وشه في الأرض.
بره المحكمة، المحامي بتاعه جري ورايا وقالي ممكن نتفاهم؟ موكلي مستعد يديكي نص البيت
قلتله لا، أنا عايزة البيت كله، والولاد معايا، ونفقة 7 سنين، وتعويض عن ال 48 ألف اللي خدتهم، ولو موافقش، الأسبوع الجاي هقدم بلاغ تزوير انه زور إمضتي على عقد الشركة
المحامي وشة اتخطف وقال هبلغه
روحت البيت، ولادي كانوا عند جارتي، حضنتهم وقلتلهم ماما رجعت، ومحدش هياخدكم من ماما
تاني يوم جوزي بعتلي رسالة أنا آسف، كنت فاكرك ضعيفة، طلعتي أقوى مني ومن أهلي ومن المحامين بتوعي، ممكن نرجع؟
مردتش عليه، عملتله بلوك، عشان اللي يضحك على واحدة داخلة المحكمة لوحدها من غير محامي، ويتريق عليها، ميستاهلش انها ترجع تطبخله تاني، يستاهل انها تقف قدامه في المحكمة وتعلمه القانون من أول وجديد، وتعلمه ان الست اللي سابت شغلها عشان بيتها، مش ست ضعيفة، دي ست قررت تضحي، ولما التضحية تتقلب إهانة، بترجع محامية تاني، محامية شاطرة جدا، وبتعرف تجيب حقها بجملة واحدة بس، جملة خلت القاعة كلها تسكت.
ومن ساعتها وأنا بشتغل تاني، فتحت مكتب محاماة صغير باسمي، وكاتبة على اليافطة كنت ست بيت، وبقيت محامية بترجع حق كل ست بيت اتقالها انتي مبتعمليش حاجة
، روحت البيت ونمت وانا حاضنة ولادي الاتنين، لأول مرة من 3 شهور أنام وانا مش خايفة انه ييجي ياخدهم من حضني.
تاني يوم الصبح لقيت حماتي بتخبط على الباب.
فتحت لقيتها لوحدها، من غير حمايا، لابسة نضارة سودة وماسكة علبة شوكولاتة.
قالت ممكن أدخل؟
قلتلها اتفضلي
دخلت وقعدت في الصالة اللي هي كانت بتقولي عليها مش نضيفة، بصت حواليها وقالت البيت نضيف زي الفل، أنا اللي كنت بتبلى عليكي
قلتلها جاية تقولي كده ليه؟
قالت عشان امبارح في المحكمة لما شغلتي التسجيل، ابني بصلي كأني أنا اللي بوظت حياته، مع ان هو اللي قالي قولي كده، هو اللي قالي نطلعها مجنونة عشان ناخد الشقة والعيال، أنا كنت فاكرة انك فعلا مش هتعرفي تردي، كنت فاكرة انك نسيتي القانون، كنت فاكرة انك بقيتي واحدة بتعرف تطبخ بس
قلتلها وأنا فعلا بعرف أطبخ، بس بعرف كمان أحبس بني آدم 3 سنين بتسجيل واحد، تحبي أوريكي؟
وشها اتخض وقالت لا والنبي، أنا جاية أعتذر، وجاية أقولك ان جوزي، حماكي، طرد ابنه من البيت امبارح بعد المحكمة، قاله انت ضحكت على واحدة كانت بتخدم أمي وأنا تعبان، انت معندكش أصل
قلت وايه اللي حصل؟
قالت ابنك ساب البيت وراح قعد عند صاحبه، وبيقول انه عايز يرجعلك، بس أنا بقولك متجريش، الراجل اللي يبيع مراته عشان شقة ده ميستاهلش، أنا لو عندي بنت مش هجوزهاله
ضحكت وقلت أول مرة تقولي كلمة حق
قالت طب اسمعي، أنا جاية أطلب منك طلب، بلاش تقدمي بلاغ التزوير، هيتسجن، والعيال هتتبهدل، خدي اللي انتي عايزاه بس بلاش سجن
