في حفلة عيد ميلاد جوزي، سحبت نفسي قدام الناس كلها وخرجت من بيته وأنا مكسورة، بقالي أسبوع كامل بحضّر لحفلة عيد ميلاد جوزي، وكنت مهتمة بكل تفصيلة صغيرة قبل الكبيرة.
كنت عايزة أعمله أحلى حفلة، وأخلي الليلة دي مميزة بالنسباله، زي ما كنت دايمًا بحاول أسعده وأثبتله إني بحبه وبخاف على بيته. كنت بختار الديكورات بنفسي، وبراجع قائمة الأكل، وبنسّق مع الناس اللي هتحضر، وكل ما حد يسألني عن سبب اهتمامي الزايد، كنت بابتسم وأقوله إن عيد ميلاد جوزي لازم يكون حاجة مختلفة.
لكن قبل عيد ميلادة بيومين كان نسي موبايلة مفتوح ودخل ياخد شاور مش من عادتي ان امسك موبايلة بس لفت نظري صوت رسايل كتير ورا بعض قولت ابص يمكن حد عايز جوزي في حاجه مهمه اقولة لكن اللي حصل اني اكتشفت الحقيقة اللي قلبت حياتي كلها في ثانية؛ جوزي بيخوني مع بنت خالته المطلقة، رشا!
والموضوع ماكانش مجرد خيانة وخلاص، لأ، دول كانوا بيخططوا إزاي يتخلصوا مني، وإزاي ينهوا جوازي منه، بس بالطريقة اللي تخليني أنا الخسرانة وهو يخرج من الحكاية من غير ما حد يلومه. قريت كلامهم أكتر من مرة، وكل كلمة كانت بتغرز جوا قلبي زي السكينة.
الشخص اللي كنت بعتبره سندي وأماني، واللي كنت مستعدة أعمل عشانه أي حاجة، كان بيخطط مع واحدة من عيلته إزاي يكسرني ويتخلص مني! حسيت إن الدنيا بتلف بيا، وإن نفسي بيتسحب مني واحدة واحدة، لكن الغريب إني ماعيطتش، ولا واجهته، ولا حتى حسسته إني شاكّة في حاجة.
#بقلم_الكاتبة_انجي_الخطيب
قفلت الموبايل، ومسحت دموعي قبل ما يشوفها، وبصيت لنفسي في المراية وقلت بهدوء: “لأ يا ليلى، مش هتديهم الفرصة اللي مستنيينها… طول ما هما فاكرين إنك مش عارفة حاجة، يبقى لسه اللعبة في إيدك.” قررت أكمّل تجهيزات الحفلة عادي جدًا، وأمثل إني الزوجة السعيدة اللي مش شايفة أي حاجة غلط في حياتها.
وجت ليلة عيد ميلاده. البيت كان مليان ناس من العيلة والأصحاب، والديكورات كانت في منتهى الشياكة، والترابيزة عليها التورتة والشموع، وكل حاجة كانت ماشية زي ما خططت بالظبط. لبست أشيك فستان عندي، ونسّقت معاه مجوهراتي، وحطيت ساعتي الغالية، ووقفت وسط الضيوف بابتسامة هادية، كأني ست محظوظة بجوزها ومش ناقصها أي حاجة في الدنيا.
أما رشا، فكانت قاعدة وسط العيلة بكل ثقة، لابسة ومتزينة وكأنها صاحبة البيت، وكل شوية عيني تيجي في عينها، فتبتسملي ابتسامة باردة، وأنا أرد عليها بابتسامة أهدى منها. كنت عارفة حقيقتها، وهي ماكانتش تعرف إني عارفه، وكنت كل شوية اشوفها تقرب من جوزي وتعمل حركات بتدلع عليه فيها قدام الكل.
ولما جه وقت التورتة، الناس كلها اتجمعت حوالين جوزي، وبدأوا يغنوا ليه، وهو وقف قدام الشموع وسط التصفيق والضحك. بصلي بابتسامة متصنعة، ومد إيده ناحيتي وقال بصوت عالي: “تعالي يا حبيبتي اقفي جنبي.” قربت منه ووقفت، وهو بص للناس وبعدين رجع بصلي وقال: “يلا يا ستي، بما إن النهارده عيد ميلادي، عايزك تتمنيلي أمنية حلوة قدام الناس كلها.”
الكل ضحك، وواحدة من قرايبه قالت: “أكيد هتتمنالك العمر الطويل والسعادة!” ضحكت بهدوء، وبصيت لجوزي في عينيه، وقلت بصوت واضح وصل لكل اللي في القاعة: “أتمنى ليك إنت ورشا بنت خالتك إنكم تتفضحوا قدام الناس كلها، وإن كل واحد يعرف حقيقتكم، ويعرف إنك بتخوني معاها من ورايا!”
في اللحظة دي، كأن حد فصل الصوت عن المكان كله. الضحك اختفى، والابتسامات اتجمدت على وشوش الناس، وكل العيون اتنقلت بيني وبين رشا. رشا قامت من مكانها بعصبية وصوتها كان بيترعش وهي بتقول: “إنتِي بتقولي إيه؟! إنتِي اتجننتي؟! إزاي تتهميني اتهام زي ده قدام الناس والعيلة كلها؟!”
بصيتلها من فوق لتحت، وابتسمت ابتسامة باردة وقلت: “إيه يا رشا؟ صدمتك إني عرفت، ولا صدمتك إني فضحتك قدام الناس وخلّيتهم يشوفوا حقيقتك؟” صرخت في وشي: “إنتِي كدابة! أنا مش هسمحلك ترمي عليا كلام زي ده!” رديت عليها من غير ما أرفع صوتي: “كدابة؟ طب بصي في عينيا وقولي إنك عمرك ما قربتي من جوزي، وقولي إنك ماكنتيش بتخططي معاه إزاي يخلص مني!”
وشها اصفر، وبصت بسرعة ناحية جوزي وكأنها مستنية منه ينقذها. أما هو، فكان واقف جنبي ووشه اتقلب من الغضب، وعروقه برزت في رقبته، وقرب مني فجأة ومسك دراعي بعنف وقال من بين سنانه: “إنتِي اتجننتي رسمي؟! اعتذري حالًا! اعتذريلي أنا وبنت خالتي قدام الناس كلها على الإهانة اللي إنتِي عملتيها دي!”
بصيت لإيده وبعدين رفعت عيني لعينيه وقلت: “وأعتذر ليه؟ عشان قلت الحقيقة؟ ولا عشان فضحتك قدام الناس بدل ما أسيبك تكمل تمثليتك عليا؟” ضغط على دراعي أكتر وقال بتهديد: “إنتِي مش فاهمة إنتِي بتعملي إيه! إنتِي هتندمي على كل كلمة قولتيها!”
شدّيت دراعي من إيده، ووقفت قدامه بثبات وقلتله: “الندم الحقيقي هيكون من نصيبك إنت، يا حبيبي. وبكرة، زي ما رشا خطفتك مني وتطلقت من جوزها عشانك، هتطلق منك إنت كمان عشان واحد تاني.” رشا شهقت وقالت: “إنتِي قليلة الأدب!” لفيت ناحيتها وقلت: “إنتِي اللي رضيتي تبقي عشيقته في السر، وقبلتي تسرقي راجل متجوز من مراته، فماتجيش النهارده تعملي فيها الشريفة!”
جوزي كان خلاص فقد أعصابه، وبصلي باحتقار وقال: “واضح إنك اتجننتي فعلًا! إنتِي فاكرة نفسك مين عشان تقفي قدامي بالطريقة دي؟! أنا محدش يسبني بالطريقة دي، فاهمة؟” ضحكت ضحكة قصيرة وقلتله: “آه، قول كده بقى! هو ده اللي مزعلك؟ غرورك هو اللي اتجرح عشان أنا اللي بقولك إني مش عايزاك!”
#حكايات_الكاتبة_انجي_الخطيب
