تقنية

اماني السيد

 

ـ وبعدين أنا عندي لك عروسة أحسن منها ألف مرة.

 

رفعت حاجبي وسألتها:

 

ـ مين؟

 

ابتسمت وقالت:

 

ـ هنا، بنت أختي.

 

أول ما سمعت الاسم، حسيت إن حاجة قديمة جوايا اتحركت.

 

هنا!

 

بنت خالة أمي، اللي كانت بتزورنا من سنين، واللي كنت معجب بيها زمان قبل ما أتجوز شروق. كانت جميلة، ودلوعه، وبتعرف تهتم بنفسها، وكل ما كانت بتيجي عندنا كنت ألاقي نفسي بتابع كلامها وضحكتها من بعيد.

 

لكنها عمرها ما كانت تعرف إني كنت معجب بيها، أو يمكن كانت عارفة وبتتجاهل الموضوع.

 

قلت لأمي وأنا بحاول أخفي حماسي:

 

ـ هنا؟ إنتِ بتتكلمي بجد؟

 

قالت:

 

ـ أيوه يا حبيبي. وأنا عارفاك، وعارفة إنك كنت معجب بيها زمان. قلت يمكن دي تبقى فرصتك تعيش الحياة اللي نفسك فيها.

 

سألتها:

 

ـ وهي هتوافق إزاي وأنا متجوز؟

 

ردت بثقة:

 

ـ سيب الموضوع عليّا. أنا هكلم أختي وأشوف رأيها.

 

وفي اللحظة دي، سمعت صوت كوباية بتتحط على الترابيزة.

 

لفيت وشي ناحية الباب، لقيت شروق واقفة، وفي إيدها صينية الشاي. وشها كان شاحب، وعينيها ثابتة عليّا كأنها سمعت آخر جملة بس.

 

أمي اتعدلت في قعدتها وقالت لها ببرود:

 

ـ إيه يا شروق؟ واقفة كده ليه؟ حطي الشاي.

 

شروق قربت وحطت الصينية، وإيديها كانت بتترعش لدرجة إن معلقة خبطت في الكوباية وعملت صوت عالي.

 

بصت لي وقالت بهدوء موجوع:

 

ـ هو إنت ناوي تتجوز عليّا يا كريم؟

 

حسيت للحظة إني اتزنقت، لكن بدل ما أعترف إني غلطان، اتعاملت معاها كأنها بتتدخل في حاجة مالهاش دعوة بيها.

 

قلت:

 

ـ وإنتِ كنتِ بتسمعي كلامنا ليه؟

 

بصت لي بذهول.

 

ـ أنا كنت جاية أقدم الشاي، وسمعت اسمي بيتجاب في الكلام، وسمعت إنك عايز تتجوز واحدة تانية. أنا مراتك يا كريم، ومن حقي أفهم.

 

أمي دخلت في الكلام بسرعة:

 

ـ ومن حقه هو كمان يعيش حياته. هو مش صغير، وبعدين إنتِ عارفة من أول يوم إنه مش مرتاح في الجوازة دي.

 

شروق بصت لها، وبعدها رجعت بصت لي.

 

ـ يعني إنت فعلًا مش مرتاح معايا؟

 

ماقدرتش أبص في عينيها، فمسكت الموبايل وقلت:

 

ـ مش وقت الكلام ده يا شروق.

 

ضحكت ضحكة صغيرة، لكن الدموع كانت بتلمع في عينيها.

 

ـ أمال إمتى وقته؟ بعد ما أتفاجئ إنك اتجوزت عليّا؟ ولا بعد ما أصحى ألاقي نفسي متطلقة ومحدش حتى كلف نفسه يقولي؟

 

ما رديتش.

 

وشروق فهمت سكوتي أكتر من أي إجابة.

 

سابت الصينية مكانها، وخرجت من الصالون من غير ما تقول كلمة تانية.

 

كنت سامع صوت خطواتها وهي طالعة السلم، وبعدها صوت باب أوضتنا وهو بيتقفل بهدوء.

 

أمي بصت لي وقالت:

 

ـ سيبك منها. شوية عياط وهتهدى. الستات كلها بتعمل كده لما تحس إن جوزها ممكن يتجوز عليها.

 

لكن لأول مرة، كلام أمي ما ريحنيش زي ما كنت متوقع.

 

فضلت قاعد مكاني، وباصص ناحية الباب اللي شروق خرجت منه، وكنت عارف إنها سمعت كل حاجة، ومع ذلك أقنعت نفسي إن السكوت أحسن، وإن الموضوع هيعدي.

 

بعد يومين، أمي كلمت أختها، وعرفت إن هنا موافقة على الجواز، لكن أختها حطت شرط واضح.

 

لازم أطلق شروق الأول، وبعدها نتكلم في الجواز الجديد.

 

لما أمي قالت لي الشرط، ما فكرتش في شروق ولا في مستقبلها، كل اللي فكرت فيه إني ماعنديش شقة تانية أروح أعيش فيها مع هنا.

 

الشقة اللي أنا وشروق عايشين فيها هي الشقة الوحيدة اللي عندي، وفرشتها شروق بنفسها على قد إمكانياتها، واختارت كل حاجة فيها بحب، حتى الستائر اللي كنت بعتبرها مجرد قماش كانت هي بتفرح بيها كأنها بتبني بيت عمرها.

 

لكن بالنسبة لي، الشقة دي كانت مجرد مكان، والأثاث القديم كان مجرد حاجات أقدر أغيرها.

 

قلت لأمي:

 

ـ خلاص، هطلق شروق، وأجدد الشقة، وأتجوز هنا.

 

أمي ابتسمت ابتسامة انتصار.

 

ـ كنت عارفة إنك هتعمل الصح لنفسك.

 

ما سألتهاش إذا كان اللي بعمله صح لشروق، لأن الإجابة كانت واضحة، وأنا ماكنتش عايز أسمعها.

 

قررت أطلق شروق غيابي، وأبلغها بعد ما أخلص كل حاجة، وكنت متخيل إن الموضوع هيكون بسيط، وإنها هتاخد شنطة هدومها وترجع بيت أبوها، وأنا أبدأ حياة جديدة مع الست اللي كنت فاكر إن قلبي اختارها.

 

لكن اللي ماكنتش أعرفه إن شروق كانت بدأت تشوفني على حقيقتي، وإن سكوتها اللي كنت فاكره ضعف كان آخر فرصة بتديهالي قبل ما تقفل الباب اللي فضلت سنين بتحاول تفتحه.

 

وفي الليلة اللي أخدت فيها قراري، رجعت البيت متأخر، ولقيت شروق قاعدة في الصالة، قدامها كوباية شاي باردة، وعلى رجليها ألبوم صور قديم.

 

كانت بتقلب في صور فرحنا.

 

دخلت، فرفعت عينيها وبصت لي.

 

ـ كنت فين يا كريم؟

 

قلت وأنا بفك أزرار القميص:

 

ـ عند ماما.

 

ـ كنتوا بتتكلموا عن هنا؟

 

وقفت مكاني.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى