فضلت واقفة مكاني صنم.. تلات شهور كاملين وأنا عايشة وبأكد لنفسي إن زياد حتى ما حسش بيوم تعبي ولا دري بيا.. ودي الوقت بعرف إنه سأل وعارف.. ومع ذلك ما كلفش نفسه يرفع سماعة التليفون!
لو كان قلقان أوي كده.. قلت بصوت مرتعش.. ليه ما جاش بنفسه؟
كريم هز كتفه بحيرة: السؤال ده.. لازم تسأليهوله هو مش أنا.
نفس اليوم، رجعت على المستشفى بخطوات مجنونة. لاقيت زياد واقف عند مكاتب العمليات، لابس البلطي مفتوح ومشمّر دراعات قميصه، والهالات السودا تحت عينه باينة قوي من السهر والشغل.
شافني فوقف مكاني: فريدة؟ فيه حاجة تخص التحاليل ولا حصل مشكلة؟
عايزة أتكلم معاك.
بص لساعته قدامي: عشر دقايق بالظبط قبل عملية.
ضحكت بمرارة: طبعاً.. دايماً عندك عشر دقايق ليا، مش كده؟
ملامحه اتغيرت: أنا ماقصدش..
هو إنت كنت عارف إني دخلت الطوارئ ليلة عيد جوازنا؟
الجملة نزلت عليه صاعقة.. سكت تماماً.. وما احتاجتش استنى إجابة، الرد كان مكتوب في عيونه.
آه.. قالها بصوت أخفض من السكون.
من امتى؟
من اليوم اللي سبتيني فيه وطلبتِ الطلاق.
وليه.. ليه ما اتكلمتش؟ ليه ما جيتش؟
زياد سند إيده على الحيطة قدامي: اتصلت.. أول يوم وتاني يوم، وبعدين بطلت.
طلّعت تليفوني باستهزاء: مستحيل.. ماجاش ليا أي مكالمة!
عشان كنتِ عاملة لي صامت.. ومأرشفة الشات من غير ما تفتحي.
سكتُّ للحظة.. افتكرت إني فعلاً عملت كده في عز غضبي عشان ما أشوفش رقمه.
وعشان كده استسلمت بالسهولة دي؟!
بص لي بعيون مليانة وجع وحزن عمر ما شوفته فيه: كنتِ طالبة الطلاق يا فريدة.. وقلتيلي بالحرف إنك مش طايقة تشوفني تاني.
كنت عايزك تحارب عشانا!
كنت عايزة أشوفك بتجري ورايا وبتثبت لي إني أهم من شغلك لأول مرة في حياتي!
صوتي كان بيعلى في الممر الفاضي، لحد ما ممرضة بصت علينا. ووطيت صوتي بالعافية ودموعي على وشك النزول: كنت عايزة أحس إني مهمة!
زياد بص للأرض بحزن: كنت فاكر إن احترامي لقرارك هو أقصى حاجة أقدر أعملها عشانك.
ما تخبيش وراء العذر ده! قبل ما نتطلق قعدت ألف مرة أطلب منك تقعد معايا وتفضالي!
عارف.
وقلتلك إني وحيدة!
عارف.
ومع ذلك ما غيرتش ولا حاجة!
دي حقيقة.. وده اللي ماكنتش عارف أصلحه.
سكتُّ.. مكنش عندي كلام تاني أقوله.
أنا ما طلبتش منك تنسي اللي فات.. كمل بصوت دافئ وواطي.. عندك حق في كل دمعة نزلتِها.. بس ما كنتش هقدر أفرض نفسي عليكي وأنا شايفك بتتعذبي معايا.
طب ليه بتبعد دلوقتي وانت لسه بتحبني؟ سألته بصوت بيترعش.
عشان الخوف الأكبر كان إني أرجع أظلمك معايا تاني.
يوم العملية.. كنت خايفة جداً، رغم طمأنة الدكتورة لينا ليا. وقبل ما الممرضة تاخدني لغرفة العمليات، لقيت حد بينادي عليا من آخر الممر: فريدة.
التفتت.. كان زياد.. بس من غير البلطي الأبيض. لابس قميص كاجوال وبنطلون بسيط.. لأول مرة من سنين ماكنش باين عليه شكل الجراح الكبير.. كان مجرد راجل خايف.
إيه جابك هنا؟
قرب مني ببطء: الدكتورة لينا قالت لي إن عمليتك النهاردة.. حبيت أطمنك قبل ما تدخلي.
مش محتاجة إحسان من حد..
مش إحسان.. أنا بس عارف إنك مرعوبة من دخول العمليات.
وسكت ثواني.. وطلع من جيبه حاجة صغيرة: دباديب قماش صغير قديم أوي..
فتحت عيني بصدمة! ده الدبدوب اللي كان محطوط على سريرنا طول سنين جوازنا.. كنت اشتكي منه وأقوله عليه، ومرة لما سحبو مني دم كتير ودوخت جابه لي وقالي اضغطي عليه جامد أول ما تخافي.
افتكرت إنه هيهديكي شوية جوة.. قالها وهو بيمده ليا.
خدته من إيده وصوابعي بتترعش: كنت مفكرك رميته!
عمري ما قدرت أرميه.. زي ما عمري ما قدرت أرمي أي حاجة تخصنا.
الدكتورة لينا هي اللي هتعمل العملية وأنا واثق فيها تماماً.. كمل كلامه وهو بيبص في عيني بصدق: ولو صحيتِ.. وعايزاني أكون قاعد هنا، هتلاقيني مستنيكي.
حسيت بدموعي بتغرق وشي.. إنت.. إنت فاضي لشغلك ومشاكلك؟
نظّمت جدولي.. اليوم ده كله بتاعي.
الجملة دي دخلت قلبي كأنها بلسم لجراح قديمة.. دي نفس الجملة اللي كنت بتمناها من سنين.. بس جات النهاردة، في الوقت اللي بقينا فيه برا اللعبة أصلاً.
لما فتحت عيني من البنج، أول حاجة حسيتها هي وجع خفيف وتعب في جسمي. بصيت يمين وشمال.. ولاقيته قاعد على الكرسي جنب السرير، وماسك دبدوب القماش في إيده وساكت. أول ما شاف عيني فتحت، قرب بلهفة: حمد لله على سلامتك يا فريدة.
صوتي كان ناشف وتعبان: خلصت؟
أيوة.. كل شىء عدى على خير، والدكتورة مبسوطة بالنتيجة جداً.
ابتسمت بتعب، ورجعت غمضت عيني ونمت تاني.
فترة التعافي ماكنتش سهلة.. كنت محتاجة مساعدة في الحركة، وفي الأكل، وفي تفاصيل صغيرة كتير. وزياد نفذ وعده.. ماحاولش يفرض نفسه كدكتور أو يزعجني، كان بيجي يجهز الفطار، يساعدني أتحرك، ولو حسيت بوجع يبقى قاعد جنب السرير يطمني.
وفي يوم واحنا قاعدين سوا بهدوء، سألته: زياد.. هو إنت فعلاً اتغيرت، ولا ده عشان لسه قلقان عليا؟
بص لي بهدوء وابتسم بحزن: بقيت أعرف أقول لأ للحالات اللي مش طارئة.. بقيت أعرف أوازن بين شغلي وبين حياتي اللي ضاعت مني.. اتعلمت الدرس بطريقة قاسية يا فريدة، بس اتعلمته بجد.
مديت إيدي ومسكت إيده: أنا خايفة أرجع أثق فيك.. وأرجع أتساب تاني.
مسك إيدي وباسها براحة: خافي براحتك.. وأنا هثبتلك كل يوم، من غير كلام كتير، إنك مش لوحدك تاني أبداً.
بعد ست شهور من اليوم ده.. كنا قاعدين في نفس الكافيه اللي اتقابلنا فيه لأول مرة زمان. زياد طلع علبة صغيرة من جيبه وحطها على الترابيزة.
فتحتها باهتمام.. لقيت فيها مفتاح.. وميدالية على شكل بيت صغير من الخشب منور بضوء هادي.
إيه ده؟ سألته مستغربة.
شقة جديدة.. قريبة من المستشفى ومن بيتك.. فيها أوضتين وشرفة كبيرة تنفع تحطي فيها الورود اللي دايماً بتموتيها.
ضحكت بصوت عالي: ورودي مش بتموت!
يا بنتي إنتِ قتلي كابتس قبل كده ببرود!
ضحكنا سوا ضحكة صافية مفيهاش أي رواسب قديمة.
بعدين سكت، وبص لي بعيون كلها أمل: مش بطلب منك ترجعي تعيشي معايا بكرة.. ولا بطلب إجابة سريعة. بس كنت عايز أعرف.. ينفع نبدأ من جديد؟
